በሆርሙዝ ሰርጥ አቅራቢያ በተከሰተ ግጭት የኢራኗ ቀሸም ደሴት በነዳጅ ተበከለች

ነሐሴ 06 ቀን 2018 (መናኸሪያ ሬዲዮ)በሆርሙዝ ሰርጥ አቅራቢያ በተካሄደ ወታደራዊ ግጭት ሳቢያ የተመቱ የነዳጅ ጫኝ መርከቦች ባስከተሉት ተደጋጋሚ የነዳጅ መፍሰስ ምክንያት፣ የኢራን የባህር ዳርቻዎች በተለይም በቀሽም (Qeshm) እና ላራክ (Larak) ደሴቶች አካባቢ በወፍራም የነዳጅ እና ታር (tar) ቆሻሻ መሸፈናቸው ተገለጸ።
 
በማህበራዊ ሚዲያዎች ላይ የተሰራጩ ተንቀሳቃሽ ምስሎች የባህር ዳርቻዎቹ ሙሉ በሙሉ ወደ ጥቁርነት መቀየራቸውንና የነዳጅ ቆሻሻው የባህር ውኃውን መሸፈኑን ያሳያሉ። ይህ የአካባቢ ጥበቃ ውድመት የጀመረው ከየካቲት 2026 ጀምሮ በቀጣናው በተቀሰቀሰው ግጭትና በንግድ መርከቦች ላይ በተሰነዘሩ ጥቃቶች ምክንያት እንደሆነ ተመልክቷል።
 
ይህ የነዳጅ ብክለት ጥበቃ የሚደረግለት የሀራ ማንግሩቭ (Hara mangrove) ደን የመጨረሻ ክፍሎች የደረሰ ሲሆን፣ የፋርስ ባሕረ ሰላጤ የውኃ ጥልቀት ማነስና አነስተኛ የውኃ እንቅስቃሴ አደጋውን አባብሶታል። ሁኔታው በኮራል ሪፎች፣ በባህር ህይወታውያን እና በአካባቢው አሳ አጥማጆች መኖሪያ ላይ ከፍተኛ ጉዳት አድርሷል።
 
የኢራን አስቸኳይ ጊዜ ባለስልጣናት የብከላውን ስፋት አረጋግጠው የፅዳት ስራዎችን ያዘዙ ቢሆንም፣ አደጋው ከአንድ ነጠላ ክስተት ይልቅ ለወራት ከቀጠለው ወታደራዊ ግጭት የተከማቸ እንደሆነ ገልጸዋል።
 
በሌላ በኩል ከኦማን ዳርቻ አቅራቢያ ከሩሲያ የነዳጅ ጫኝ መርከብ የወጣ ሌላ የነዳጅ ብክለት የተስተዋለ ሲሆን፣ ይህም ክስተት ግጭቱ ካበቃ በኋላም ለረጅም ጊዜ የሚቆይ የአካባቢ ውድመት እንደሚያስከትል ስጋት ፈጥሯል።
__

ሀሳብ እና’ሳ’ፍራለን