የሴቶች ያለዕድሜ ጋብቻ እና ግርዛት የወንጀል ህግ እንዲሻሻል ለፍትህ ሚኒስቴር የማሻሻያ ጥናት መቅረቡ ተገለጸ

መስከረም 15 ቀን 2019 ዓ.ም (መናኸሪያ ሬዲዮ) በሴቶች እና ማህበራዊ ጉዳይ ሚኒስቴር በኩል የሴት ልጅ ግርዛትን በተመለከተ የተጣለው የወንጀል ቅጣት እጅግ አነስተኛ በመሆኑ እንዲሻሻል የህግ ማሻሻያ ጥናት ለፍትህ ሚኒስቴር መቅረቡ ተገልጿል። በወንጀል ህጉ የተቀመጠው የሴት ልጅ ግርዛት ቅጣት የሦስት ወራት እስራት እና የ500 ብር የገንዘብ መቀጮ ብቻ መሆኑን በመጥቀስ፣ ይህ የድርጊቱን ፈጻሚዎች የሚያስተምር እና መጣኝ ባለመሆኑ ጥናቶችን በማድረግ ህጉ እንዲሻሻል ለፍትህ ሚኒስቴር መላኩን በሴቶች እና ማህበራዊ ጉዳይ ሚኒስቴር የሴቶች መብት ጥበቃና ምላሽ መሪ ሥራ አስፈፃሚ አቶ አለሙ ወርቁ ተናግረዋል። ጉድለት ያለባቸውን ህጎች የመለየቱ ሥራ የሴቶችና ማህበራዊ ጉዳይ ሚኒስቴርን ጨምሮ ፍትህ ሚኒስቴር፣ ጤና ሚኒስቴር እና የተለያዩ ባለድርሻ አካላት በቅንጅት የተሳተፉበት መሆኑን ጠቅሰዋል። ሚኒስቴር መስሪያ ቤቱ ከህግ ማሻሻያ ባለፈ በግል በዚህ ጉዳይ ላይ ከሚሰሩ የተለያዩ ማህበራት ጋር በጋራ በመስራቱ አሁን ላይ ለሚታዩ መሻሻሎች ትልቅ አስተዋጽኦ ማበርከቱን አብራርተዋል። ችግሩ እጅግ አሳሳቢ በመሆኑ በመንግስትም ሆነ በግል በሚንቀሳቀሱ ማህበራት በኩል የሚሰሩ ሥራዎች ተጠናክረው ሊቀጥሉ እንደሚገባ ተመልከቷል። ___ ሀሳብ እና‘ሳ‘ፍራለን