መስከረም 07 ቀን 2019ዓ.ም.(መናኸሪያ ሬዲዮ) ንጋት ግሎባል ኢኒሼቲቭ የፕሮጀክቱ ዋነኛ አካል በሆነው የፍልሰት ግንዛቤ ማስጨበጫና የሙያ ስልጠና መሰረት፣ ተመላሾችን በተለያዩ የሙያ መስኮች አሰልጥኖ ለመጀመሪያ ጊዜ በዛሬው እለት ማስመረቁን አስታውቋል። በ10ኛው ዙር የስልጠና መርሃ ግብሩ ለ30 ወጣቶች ስልጠና ሰጥቶ ማስመረቅ መቻሉን የንጋት ግሎባል ኢኒሼቲቭ መስራችና ሥራ አስኪያጅ አቶ ዳንኤል መለሰ ለመናኸሪያ ሬዲዮ ተናግረዋል። ከስደት ተመላሽ ወጣቶቹ በምግብ ዝግጅት፣ በውበት ሳሎን፣ በቤት አያያዝና ላውንደሪ፣ እንዲሁም በልጆች እንክብካቤ የሙያ መስኮች ላይ ስልጠና መውሰዳቸውንም ገልጸዋል። ተቋሙ ከተቋቋመ ገና ሁለተኛ ዓመቱ መሆኑን የገለጹት ሥራ አስኪያጁ፤ ወጣቶች በሀገራቸው የሥራ እድል ፈጥረው እንዲሰሩና በፍልሰት ዙሪያ ትክክለኛ መረጃ እንዲያገኙ የሚያግዙ ስልጠናዎችን እንደሚሰጥ አብራርተዋል። በሁለት ዓመት ጊዜ ውስጥ ለመጀመሪያ ጊዜ 30 ወጣቶችን አሰልጥኖ ቢያስመርቅም፣ ወደፊት ቁጥራቸው በርከት ያሉ ሰልጣኞችን በተለያየ የሙያ ስብጥር አስመርቆ ሥራ ለማስቀጠር እንደሚሰራ ተገልጿል። አሁን ላይ ከተመረቁት 30 ከስደት ተመላሽ ወጣቶች መካከል 11ዱ ሥራ መጀመራቸውን አቶ ዳንኤል ተናግረዋል። ቀሪዎቹ ሰልጣኞችም በቅርቡ ሥራ እንደሚያገኙ በምረቃ መርሃ ግብሩ ላይ የተገኙት የአዲስ አበባ ከተማ አስተዳደር ሥራና ክህሎት ቢሮ የሥራ ስምሪት አገልግሎት ዳይሬክተር አቶ ሰብሃዲን ሱልጣን አስታውቀዋል። ___ ሀሳብ እና‘ሳ‘ፍራለን
ምላሽ ይስጡ