ሰበር ዜና፡ ከሰሜን ኮሪያ የተተኮሰው ሚሳኤል የቀጣናውን ውጥረት እንደገና አናጋው!

ነሐሴ 06 ቀን 2018 (መናኸሪያ ሬዲዮ)አሜሪካ እና ደቡብ ኮሪያ ሊያካሂዱት ካዘጋጁት ግዙፍ የጋራ ወታደራዊ ልምምድ ጥቂት ቀናት ቀደም ብሎ፣ ሰሜን ኮሪያ ሌላ አዲስ የባሊስቲክ ሚሳኤል በማስወንጨፍ ቀጣናውን አስበርግጋለች። የደቡብ ኮሪያ እና የጃፓን ወታደራዊ ባለስልጣናት እንደገለፁት፣ ውጥረት በነገሰበት የኮሪያ አካባቢ የተደረገው ይህ ድርጊት አዲስ የፖለቲካ እና የደህንነት ስጋት ደቅኗል።
 
የፒዮንግያንግ አስተዳደር ሚሳኤሉን የተኮሰው ከምስራቃዊ የወንሳን የባህር ዳርቻ ሲሆን፣ የጦር መሳሪያው በምስራቅ ባህር (የጃፓን ባህር) ላይ ከ700 ኪሎ ሜትር በላይ ርቀት ተጓዞ አርፏል። ይህ በአንድ ሳምንት ጊዜ ውስጥ የተደረገ ሁለተኛው የሚሳኤል ሙከራ ሲሆን፣ የሰሜን ኮሪያ የጦር ዝግጁነት እና ግትር አቋም ምን ያህል እንደቀጠለ ማሳያ ተደርጎ ተወስዷል።
 
ይህ ድርጊት አሜሪካ እና ደቡብ ኮሪያ “ኡልቺ ፍሪደም ሺልድ” የተሰኘውን አመታዊ መጠነ-ሰፊ ወታደራዊ እንቅስቃሴ ለመጀመር በሚዘጋጁበት ወቅት መከናወኑ ድንገተኛ እንዳልሆነ ይነገራል። ሰሜን ኮሪያ እነዚህን የጋራ ልምምዶች ሀገሬን ለመወረር የሚደረጉ ማደናገሪያዎች ናቸው በማለት አጥብቃ የምትቃወም ሲሆን፣ የአሁኑ ማስወንጨፍም ለዋሽንግተን እና ለሴኡል የተላከ ግልፅ ማስጠንቀቂያ እንደሆነ ባለሙያዎች ይናገራሉ።
 
የደቡብ ኮሪያ ብሔራዊ ደህንነት ምክር ቤት እና የጃፓን የመከላከያ ሚኒስቴር ድርጊቱን ወዲያውኑ የኮነኑ ሲሆን፣ የተባበሩት መንግስታት ድርጅትን ውሳኔዎች የሚጥስና የቀጣናውን ሰላም የሚያናጋ የትንኮሳ ተግባር ነው ብለውታል። በምላሽም ሴኡል፣ ዋሽንግተን እና ቶኪዮ መረጃዎችን በጋራ ለመለዋወጥ እና ለማንኛውም አይነት ወታደራዊ እንቅስቃሴ ተመጣጣኝ ምላሽ ለመስጠት በከፍተኛ ዝግጁነት ላይ እንደሚገኙ አስታውቀዋል።
 
__

ሀሳብ እና’ሳ’ፍራለን