የተማረኩ ጦር መሳሪያዎችን ለወታደራዊ አታሼዎች እና ዲፕሎማቶች ማስጎበኘት በጦር ሜዳ የተገኘውን ድል በፖለቲካና ዲፕሎማሲ መድገም መሆኑ ተገለጸ

 
ጥቅምት 09 ቀን 2019 (መናኸሪያ ሬዲዮ) የኢትዮጵያ መከላከያ ሰራዊት ከህወሓት እና አጋሮቹ የማረካቸውን የጦር መሳሪያዎች ለተለያዩ የዲፕሎማቲክ ማህበረሰብ አባላት ማስጎበኘቱ በጦር ሜዳ የተገኘውን ድል በፖለቲካና ዲፕሎማሲ መድገም መሆኑን የዓለም አቀፍ ግንኙነት ባለሙያዎች ለመናኸሪያ ሬዲዮ ተናግረዋል።
 
በዲላ ዩኒቨርሲቲ የታሪክና ዓለም አቀፍ ግንኙነት መምህርና ተመራማሪ ዶክተር አብዱ መሀመድ ይህ ዓይነቱ አካሄድ በዓለም አቀፍ መድረክ የተለመደ መሆኑን በመግለጽ፣ ወታደራዊ ድል በዲፕሎማሲና ፖለቲካ ካልታጀበ ሙሉ አይሆንም ብለዋል።
 
በታሪክ አጋጣሚዎች ከዚህ ቀደም በጦር ሜዳ የተገኘው ወታደራዊ ድል በዲፕሎማሲና ፖለቲካ ባለመታጀቡ ኢትዮጵያ ዋጋ የከፈለችባቸውን ጊዜያት በማስታወስ፣ የአሁኑ እርምጃ ከዚያ ትምህርት የተወሰደበትና የዲፕሎማሲ የበላይነትን ለመያዝ የሚያግዝ ነው ብለዋል።
 
በተጨማሪም የጦር መሳሪያ በሚያቀብሉ እና በሚሸጡ ሀገራት ላይ ጫና ለማሳደር ትልቅ ጉልበት እንዳለው አስምረውበታል።
 
ጉብኝቱ ቀጠናውን ወደ ትርምስና አለመረጋጋት ለማስገባት ታጣቂዎችን ሲያስታጥቁ ለነበሩ ሀገራት ያለው መልዕክት ጉልህ ነው ያሉት ደግሞ በዋቻሞ ዩኒቨርሲቲ የፖለቲካል ሳይንስና ዓለም አቀፍ ግንኙነት መምህርና ተመራማሪ አበራ ሄፕሶ ናቸው።
 
የዓለም አቀፉ ማህበረሰብ በግብፅ አስተባባሪነት አካባቢውን በትርምስ ውስጥ ለማቆየት የሚደረገውን እንቅስቃሴ እንዲረዳ ያደርጋል ብለዋል።
 
ከዚህም በተጨማሪ የኢትዮጵያ የባህር በር ጥያቄ መመለስ ያለውን ፋይዳ ለማሳየት ይረዳል ባይ ናቸው።

የአሜሪካው የውጭ ጉዳይ ሚኒስትር ማርክ ሩቢዮ ኢትዮጵያ ከተገንጣዮችና ሽብርተኞች ካሏቸው ኃይሎች ራሷን ለመከላከል ተመጣጣኝ ምላሽ እየወሰደች መሆኑን አሜሪካ እንደምትረዳ መግለጻቸው የሚታወስ ነው።
 
__

ሀሳብ እና’ሳ’ፍራለን