የዓለም የቱሪዝም ቀን ሲከበር ለሰው ሰራሽ አስተውሎትና ለዲጂታል ቴክኖሎጂው ሚና ልዩ ትኩረት እንደሚደረግ ተገለጸ

መስከረም 14 ቀን 2019 ዓ.ም (መናኸሪያ ሬዲዮ) የዓለም የቱሪዝም ቀን ሲከበር ዘመኑ የደረሰበት የሰው ሰራሽ አስተውሎት ቴክኖሎጂ ለቱሪዝሙ ዘርፍ የሚያመጣው ሚና የሚነገርበትም እንደሆነ የቱሪዝም ሚኒስትሯ ሰላማዊት ካሳ ትላንት በሰጡት መግለጫ አስታውቀዋል። በዓለም አቀፍ ደረጃ ለ47ኛ በኢትዮጵያ ደግሞ ለ39ኛ ጊዜ “የዲጂታል አጀንዳ እና የሰው ሰራሽ አስተውሎት ለቱሪዝም አዲስ ቅኝት” በሚል መሪ ቃል እንደሚከበር የተገለጸው የዘንድሮው የዓለም የቱሪዝም ቀን ፡ የሰው ሰራሽ አስተውሎት እና ዲጂታል ቴክኖሎጂዎች የአገልግሎት ጥራትን ለማስጠበቅ ትኩረት የሚሰጥበትም ወቅት ነው ተብሏል። ቴክኖሎጂው በቱሪዝም ዘርፍ የጎብኚዎችን ፍላጎት መሰረት ያደረገ መረጃ ለመስጠት፣ የጉዞ ዕቅድና ቆይታ ለማቀላጠፍ፣ የቱሪዝም መዳረሻዎችን በተቀናጀ መንገድ ለማስተዋወቅ እና የአገልግሎት ጥራትን ለማሻሻል ከፍተኛ ሚና እየተጫወተ መሆኑን ሚኒስትሯ ጠቅሰዋል፡፡ የዓለም አቀፍ ቱሪዝም ቀን በማስመልከት በትላንትናው እለት አዲስ የቱሪስት ዲጂታል የመረጃ ማዕከል ተመርቆ ወደ ስራ መግባቱንም ሚኒስትሯ አስታውቀዋል። በዓሉ ከመስከረም 14 እስከ 17 ቀን 2019 ዓ.ም በተለያዩ ፕሮግራሞች የሚከበር ሲሆን ከሚከበርባቸው ኹነቶች መካከልም ጎብኚዎችን ከአዲስ አበባ ወደ ቤኑና መንደር በባቡር ትራንስፖርት ማጓጓዝ፣የጎንደር ቤተ መንግስት እና የጅማ አባ ጅፋር ቤተ-መንግስት የእድሳት ስራዎች ተጠናቀው “ሕይወት በአብያተ መንግስት” በተሰኘ ፕሮጀክት ለጎብኚዎች ክፍት እንደሚደረጉም ጠቁመዋል። የዘንድሮው የዓለም የቱሪዝም ቀን በጎንደር ከተማ እንደሚከበርና ክብረ በአሉም የዓለም አቀፍ የማይዳሰስ ቅርስ የሆነውን የመስቀል ደመራ በዓል በጋራ ማከበርን እንደሚያካትትም ጭምር ሚኒስትሯ ገልጸዋል። አሁን ላይ በዘርፉ የሚደረጉና የተደረጉ የዲጂታል ስርአት ለውጦችና ተሞክሮዎች ለሰው ሰራሽ አስተውሎት ትግበራም መንገድ የሚከፍቱ በመሆናቸው ጅምሩ ከዘንድሮው የዓለም የቱሪዝም ቀን መሪ ቃልም ጋር የተስማማ እንደሆነ አብራርተዋል። የሰው ሰራሽ አስተውሎትን መጠቀም በተለይ በጎብኚዎች ፍላጎት ላይ ተመስርቶ አገልግሎት ለመስጠት ይበልጥ አጋዥ ስለመሆኑም ተጠቁሟል ___ ሀሳብ እና‘ሳ‘ፍራለን