የመስቀል በዓል በሰላም እንዲከበር የፀጥታ አካላት በቂ ዝግጅት ማድረጋቸው ተገለፀ

መስከረም 12 ቀን 2019 ዓ.ም (መናኸሪያ ሬዲዮ) በመጪው መስከረም 16 ቀን 2019 የሚከበረው የደመራ እንዲሁም የመስቀል በዓል በሰላም እንዲከበር ቢሮው የሰላምና ፀጥታ ሥራውን እየሠራ እንደሚገኝ ለጣቢያችን አስታውቋል፡፡ በአዲስ አበባ ከተማ አስተዳደር የሰላም እና ፀጥታ ቢሮ ምክትል ቢሮ ኃላፊ አቶ ፍሥሐ ጥበቡ፤ በዩኔስኮ የተመዘገበው የመስቀል በዓል ሃይማኖታዊ ሥርዓቱን በጠበቀ መልኩ እንዲከበር የፀጥታ አካላት በቂ ዝግጅት ማድረጋቸውን ገልጸዋል። አስቀድሞ ከማህበረሰቡ ጋር በቂ ውይይት መደረጉን የተናገሩት አቶ ፍሥሐ፤ የኢትዮጵያን ገጽታ ሊገነባ በሚችል ደረጃ በዓሉ እንዲከበር ከፀጥታ አኳያ ተገቢው ዝግጅት መደረጉን አመላክተዋል። ምክትል ቢሮ ኃላፊው አክለውም የሃይማኖት አባቶች በሚያስቀምጡት ሥርዓት መሠረት በዓሉ እንዲከበር ማህበረሰቡ አስፈላጊውን ትብብር እንዲያደርግ አሳስበዋል። ከፀጥታ ጎን ለጎን በየሰፈሩ በሚካሄደው የደመራ ማብራት ሥርዓት ላይ ምንም ዓይነት አደጋ እንዳይከሰት ተገቢው ጥንቃቄ ሊደረግ እንደሚገባም አስገንዝበዋል። በዚህ በዓል ላይ በርካታ የሀገር ውስጥ እንዲሁም ከተለያዩ የዓለም ሀገራት ቱሪስቶች የሚገኙ በመሆኑ፣ የፀጥታ አካላት አስቀድመው ሕግና ሥርዓትን በጠበቀ መልኩ የፍተሻ እና የቅኝት ሥራዎችን እንደሚያደርጉ አመላክተዋል። መስቀል እንዲሁም በቀጣይ በሚከበረው የኢሬቻ በዓል በሰላም ተከብረው እንዲያልፉ የአዲስ አበባ ከተማ ነዋሪዎች ተገቢውን ትብብር እንዲያደርጉ ጥሪ አቅርበዋል። ___ ሀሳብ እና‘ሳ‘ፍራለን