የዓለማችን እጅግ አስገራሚው ሚሊየነር፦ በቆሻሻ ማጠራቀሚያዎች ውስጥ የሚኖረው ባለሀብት ታሪክ

መስከረም 12 ቀን 2019 ዓ.ም (መናኸሪያ ሬዲዮ) በአሁኑ ዘመን “ሚሊየነር” ሲባል በአብዛኛው ሰዎች አእምሮ ውስጥ የሚመጣው ምስል የቅንጦት መኪናዎች፣ ውድ ቪላዎች፣ የዲዛይነር ልብሶች እና የተንደላቀቀ የአኗኗር ዘይቤ ነው። ነገር ግን በጀርመን የዳርምስታድት (Darmstadt) ከተማ ነዋሪ የሆነው የ80 ዓመቱ ሄንዝ ቢ. (Heinz Bube) ይህንን የተለመደ የሀብታሞች አስተሳሰብ ሙሉ በሙሉ የሚሰብር አኗኗር በመከተል ላይ ይገኛል:: ሄንዝ በከተማዋና በአካባቢዋ ከ10 በላይ የሚሆኑ የሪል እስቴት ይዞታዎች እና በርካታ አፓርታማዎች ያሉት ባለሀብት ቢሆንም፣ በጎዳናዎች ላይ ሲንቀሳቀስ የሚያየው ማንኛውም ሰው ግን ቤት አልባ ተዳዳሪ እንደሆነ አድርጎ ይቆጥረዋል።ለዚህም ዋናው ምክንያት የእሱ የዕለት ተዕለት ሕይወት እጅግ በጣም ጽኑ በሆነ ቁጠባ ላይ የተገነባ በመሆኑ ነው። ቀደም ሲል በቴሌኮሙኒኬሽን ዘርፍ በከፍተኛ ኤሌክትሪክ ኢንጂነርነት ሲሰራ የቆየው ሄንዝ፣ በአሁኑ ወቅት በየወሩ ከ3,600 ዩሮ በላይ የጡረታ አበል ያገኛል። ይህ ገቢው ብቻውን በደስታና በቅንጦት ለመኖር የሚያስችለው ቢሆንም፣ እሱ ግን ገቢውን ሙሉ በሙሉ የሚያውለው አዳዲስ ቤቶችን ለመግዛት ነው። ሄንዝ ለምግብና ለዕለት ተዕለት ፍጆታው በወር ከ5 እስከ 10 ዩሮ ብቻ የሚያወጣ ሲሆን፣ አብዛኛውን ምግብና አልባሳት የሚያገኘው በየመንገዱ ከሚገኙ የቆሻሻ ማጠራቀሚያዎች ውስጥ በመልቀም እንደሆነ ይነገራል። ይህን ልዩ የአኗኗር ዘይቤውን ሲያስረዳም፣ ዋና ፍላጎቱ ቤቶችን መግዛት፣ በራሱ ጥረት መጠገን እና የሀብት መጠኑ ሲያድግ ማየት ብቻ እንደሆነ ይናገራል። ባንክ ውስጥ ለተለያዩ አገልግሎቶች አላስፈላጊ ክፍያዎችን ላለመክፈል እና ገንዘቡ በዋጋ ግሽበት እንዳይቀንስ ሲል የሚያገኛቸውን የኪራይና የጡረታ ገቢዎች በሙሉ በካሽ በመሰብሰብ ወዲያውኑ ወደ ሪል እስቴት ኢንቨስትመንት ይለውጣቸዋል። በተጨማሪም ቅርብ ወራሽ ወይም ልጅ የሌለው በመሆኑ፣ ከሞተ በኋላ የገነባውን ይህን ግዙፍ የቤት ንብረት ለዳርምስታድት ከተማ አስተዳደር ሊተወው እንደሚችል ገልጻል። የዚህ ሰው ታሪክ “ሀብታም መሆን ማለት ብዙ ማውጣት ሳይሆን ያገኘነውን በአግባቡ መያዝ ነው” የሚለውን የፋይናንስ መርህ በተግባር የሚያሳይ ቢሆንም፣ በሕይወት እያሉ በሀብት መደሰትና ሰዎችን መርዳትስ የለበትም ወይ? የሚለው ጥያቄ በብዙዎች ዘንድ አሁንም አከራካሪ ነጥብ ሆኖ ቀጥሏል። ___ ሀሳብ እና‘ሳ‘ፍራለን