መስከረም 11 ቀን 2019 ዓ.ም (መናኸሪያ ሬዲዮ)በበጋ ወራት ሁለተኛ የዝናብ ወቅታቸውን በሚያገኙ የደቡብ እና ደቡብ ምሥራቅ አካባቢዎች ያሉ አርሶ አደሮች የሚያገኙትን ዝናብ በአግባቡ ሊጠቀሙ እንደሚገባ የኢትዮጵያ ሜቴኦሮሎጂ ኢንስቲትዩት አስታውቋል፡፡ በኢንስቲትዩቱ ትንበያ መሠረት በአካባቢው ለሚገኙ አርሶ አደሮች፣ ከፊል አርሶ አደሮች እና አርብቶ አደሮች መረጃው እንዲደርስ እየተደረገ መሆኑን የተቋሙ የግብርና ሜቴኦሮሎጂ ባለሙያ አቶ ይመር አሰፋ ገልጸዋል፡፡ በአካባቢው የሚኖሩ አርሶ አደሮች በወቅቱ የመሬት ዝግጅት፣ የዘር ምርጫ እና የግብዓት አቅርቦት ሥራ ማከናወን እንዳለባቸው ጠቅሰዋል፡፡ የተለያየ የዝናብ መጠን እና ሥርጭት ሊያጋጥም ስለሚችል አርሶ አደሮች ከአካባቢያቸው የግብርና ባለሙያዎች ጋር በመመካከር ለዝናብ ሁኔታው ተስማሚ ጊዜ እና የዘር ዓይነት መምረጥ እንዳለባቸው ተናግረዋል፡፡ በሌላ በኩል በበጋው ወራት የኤልኒኖ ክስተት ለእነዚህ አካባቢዎች አዎንታዊ ሚና እንዳለው የተናገሩት ባለሙያው፤ በሰሜን አጋማሽ አካባቢዎች ደግሞ ሰብል የሚሰበሰብበት ወቅት እንደመሆኑ ወቅቱን ያልጠበቀ ዝናብ የሚያስከትል በመሆኑ አሉታዊ ተጽዕኖ እንደሚኖረው አብራርተዋል፡፡ ኢንስቲትዩቱ ከአጋር ድርጅቶች ጋር በመሆን በተለያዩ አማራጮች የበጋ የአየር ትንበያ መረጃ ተደራሽ እንዲሆን ትኩረት ሰጥቶ እየሠራ መሆኑን አቶ ይመር ገልጸዋል፡፡ በደቡብና ደቡብ ምሥራቅ አካባቢዎች የበልግ ዝናብን የሚጠብቁ አርሶ አደሮች፣ የሚገኘውን የዝናብ ዕድል ወደ ምርት ለመቀየር የዘር፣ የመሬት፣ የግብዓትና የውኃ ዝግጅታቸውን በወቅቱ ማጠናቀቅ እንዳለባቸው ተመልክቷል፡፡ ___ ሀሳብ እና‘ሳ‘ፍራለን
ምላሽ ይስጡ