ሰኔ 18 ቀን 2018(መናኸሪያ ሬዲዮ) የሩሲያ መከላከያ ሚኒስቴር እንዳስታወቀው፣ የሀገሪቱ የአየር መከላከያ ክፍሎች በአንድ ሌሊት ብቻ ወደ ተለያዩ የሩሲያ ግዛቶች የተተኮሱ 323 የዩክሬን ሰው አልባ አውሮፕላኖችን (ድሮኖችን) መትተው ጥለዋል። ይህ ጥቃት ግጭቱ ከተቀሰቀሰበት ጊዜ ጀምሮ ዩክሬን በሩሲያ ሰማይ ላይ የሰነዘረችው እጅግ ከፍተኛውና ግዙፉ የረጅም ርቀት የድሮን ውርጅብኝ ተብሏል።
የሩሲያ ወታደራዊ ባለስልጣናት እንደገለጹት፣ የዩክሬን ድሮኖች የሀገሪቱን ጥልቅ ግዛቶች ጨምሮ ከ20 በላይ ክልሎችን ኢላማ ያደረጉ ሲሆን፥ በተለይም ቤልጎሮድ፣ ቮሮኔዝ፣ ኩርስክ፣ ብራያንስክ እና የዋና ከተማዋ ሞስኮ አከባቢዎች ላይ ከባድ የአየር ላይ ውጥረት ፈጥረው አድረዋል። ጥቃቱን ተከትሎም በበርካታ የሩሲያ ከተሞች የአየር ጥቃት ማስጠንቀቂያ ሳይረን ሲጮህ ያደረ ሲሆን፥ አስቸኳይ የደህንነት እርምጃዎችም ተወስደዋል።
የሩሲያ አየር መከላከያ አብዛኞቹን ድሮኖች ማክሸፍ ቢችልም፣ በቤልጎሮድ ክልል የነበረውን መከላከያ ሰብሮ የገባ አንድ የዩክሬን ድሮን በቪዲሌቭስኪ ወረዳ ላይ ከባድ ጉዳት አድርሷል። የክልሉ ባለስልጣናት እንዳረጋገጡት፣ በዚህ ጥቃት አንድ ሲቪል ሰው ወዲያውኑ ሲሞት፣ ሌላ አንድ ሰው ደግሞ ለሕይወቱ የሚያሰጋ ከባድ አካል ጉዳት ደርሶበታል።
ይህ የአንድ ሌሊት የድሮን ማዕበል ዩክሬን በሩሲያ ላይ የሰነዘረችው ታሪካዊ ጥቃት መሆኑ በሩሲያ ባለስልጣናት የተገለጸ ቢሆንም፥ ሩሲያ መታሁት ስላለችው የድሮን ብዛት እና ስላደረሰችው ትክክለኛ የጉዳት መጠን ከገለልተኛ ወገን የሚደረጉ ማረጋገጫዎች አሁንም እንደቀጠሉ ናቸው።
ይህ በሩሲያ እና ዩክሬን ጦርነት ውስጥ የታየው አዲስ ከፍተኛ መባባስ ሲሆን፥ ተጨማሪ ዝርዝር መረጃዎችን እንደደረሱን የምናቀርብ ይሆናል።
__
ሀሳብ እና’ሳ’ፍራለን
ምላሽ ይስጡ