ሐምሌ 22 ቀን 2018(መናኸሪያ ሬዲዮ) በኢንሹራንስ ኢንስቲትዩት ለትራፊክ ደህንነት (IIHS) ይፋ የተደረገ አዲስ ጥናት እንደሚያመለክተው፣ ዌይሞ (Waymo) የተሰኙት አሽከርካሪ አልባ ታክሲዎች ከሰው አሽከርካሪዎች ጋር ሲነጻጸሩ በከፍተኛ ደረጃ አስተማማኝና ደህንነታቸው የተጠበቀ መሆናቸው ተረጋገጠ። ሮቦታክሲዎቹ ከ50 ሚሊዮን ማይል በላይ በሸፈነው ጉዞ ባስመዘገቡት የደህንነት መረጃ መሠረት፣ ለፖሊስ ሪፖርት የሚደረጉ የትራፊክ አደጋዎችን የመቀነስ ከፍተኛ ብቃት አሳይተዋል።
በጥናቱ ግኝት መሠረት አሽከርካሪ አልባ ታክሲዎቹ በሰው ከሚነዱ ተሽከርካሪዎች ጋር ሲነጻጸሩ በ68% አነስተኛ አደጋ አስመዝግበዋል። የሰው አሽከርካሪዎች በየአንድ ሚሊዮን ማይል 4.06 አደጋዎችን የሚያስመዘግቡ ሲሆን፣ የዌይሞ ታክሲዎች ግን ይህንን ቁጥር ወደ 1.28 ብቻ ዝቅ አድርገውታል። ከዚህ በተጨማሪም በዌይሞ ተሽከርካሪዎች የሚከሰቱት አደጋዎች አነስተኛ ጉዳት የሚያደርሱ ናቸው ተብሏል።
ይህ ጥናት በፊኒክስ፣ ሳን ፍራንሲስኮ እና ሎስ አንጀለስ ከተሞች የተካሄደ ሲሆን፣ በነዚህ ቦታዎች ዌይሞ ከፍተኛ ብቃት አሳይቷል። ሆኖም ግን በኦስቲን ከተማ የተወሰደው የናሙና መጠን በጣም አነስተኛ በመሆኑ ከተሽከርካሪዎቹ አፈጻጸም አንጻር ከሰው አሽከርካሪዎች በጥቂቱ ዝቅ ብሎ ተመዝግቧል።
ተመራማሪዎቹ ንጽጽሩ ፍትሃዊ እና ትክክለኛ እንዲሆን ለማድረግ የፍጥነት መንገድ (ሀይዌይ) መረጃዎችን እና ጥቃቅን የጭረት አደጋዎችን ከስሌቱ ውጭ አድርገዋል። ምክንያቱም ዌይሞ የሚያገለግለው በከተማ ውስጥ መንገዶች ላይ ብቻ ከመሆኑም በላይ ማንኛውንም ጥቃቅን ግጭት በቴክኖሎጂ መዝግቦ ሪፖርት ያደርጋል፤ በአንጻሩ የሰው አሽከርካሪዎች አብዛኛውን ጊዜ ትልልቅ አደጋዎችን ብቻ ሪፖርት ያደርጋሉ ተብሏል።
የ IIHS ተመራማሪዎች የተገኘው ውጤት በጣም አበረታች መሆኑን ቢገልጹም፣ ስለ ሮቦታክሲዎች ደህንነት ሙሉ በሙሉና ሰፊ ድምዳሜ ላይ ለመድረስ አሁንም ተጨማሪ የመንገድ ላይ መረጃዎች ያስፈልጋሉ ሲሉ አሳስበዋል።
__
ሀሳብ እና’ሳ’ፍራለን
ምላሽ ይስጡ