ነሐሴ 07 ቀን 2018 (መናኸሪያ ሬዲዮ)በአዲስ አበባ ዩኒቨርሲቲ የጂኦፊዚክስ፣ ስፔስ ሳይንስና አስትሮኖሚ ተቋም ዳይሬክተር ዶክተር ብርሃኑ አበራ የሚከሰቱ የተፈጥሮ አደጋዎች የራሳቸው የሆነ ሂደት እንዳላቸው ገልጸው፤ እንደ ማሳያም ከቅድመ-ምልክት ጀምሮ በተደጋጋሚ እና በቁጥር በርከት ብለው የመሬት መፈራረስ የሚያስከትሉትን በማንሳት አብራርተዋል።
ተቋሙ የስነ-መሬት እንቅስቃሴዎችን በቋሚነት በመከታተልና በመመዝገብ ላይ እንደሚገኝም ዳይሬክተሩ አክለዋል። ተቋሙ የክትትልና የጥናት ስራዎቹን ውጤታማ ለማድረግ ከተለያዩ ሀገር በቀልና ዓለም አቀፍ ተቋማት ጋር በትብብር እየሰራ እንደሚገኝና ለአብነትም ከኢትዮጵያ ጂኦሎጂካል ሰርቬይ፣ ከኢትዮጵያ አደጋ ስጋት አመራር ኮሚሽን እንዲሁም በአለም አቀፍ ደረጃ ካሉ ዩኒቨርሲቲዎች ጋር አስማምሮ እየሰራ መሆኑን ተናግረዋል።
በአሁኑ ወቅት በዓለም አቀፍ ደረጃ ከፍተኛ የመመዝገብ አቅም ያላቸውና «ብሮድ ባንድ» በመባል የሚታወቁ ዘመናዊ መሣሪያዎችን በመጠቀም ላይ እንደሚገኙ የገለጹት ዳይሬክተሩ፤ እነዚህ መሣሪያዎች በየትኛውም የዓለም ክፍል የሚከሰቱና በሬክተር ስኬል ከ4.5 በላይ የሆኑ የመሬት መንቀጥቀጥ ክስተቶችን በስፋት የመመዝገብ አቅም ያላቸው ናቸው ብለዋል። አብዛኞቹ መሣሪያዎች ውድ በመሆናቸው በዓለም አቀፍ ድጋፍና በጋራ ትብብር የተገኙ መሆናቸውንም ጠቅሰዋል።
ሆኖም ግን የኢትዮጵያ የቆዳ ስፋት ሰፊ በመሆኑና የመሬት መንቀጥቀጥ ስጋት ያለበት ሁኔታ በመኖሩ፣ በዘርፉ የሚሰሩ ባለሙያዎችና ተቋማት ቁጥር አሁንም በቂ አለመሆኑን ዶክተር ብርሃኑ ተናግረዋል።
በርካታ ተቋማትና በቂ የስነ-መሬት ባለሙያዎች የሚያስፈልጉ ቢሆንም፣ በአሁኑ ወቅት ያለው የሰው ኃይል እጥረት ለዘርፉ ትልቅ ፈተና ሆኖ መቀጠሉ ተመላክቷል።
__
ሀሳብ እና’ሳ’ፍራለን
ምላሽ ይስጡ