ሰበር ዜና፦ ኢራን በባህሬን፣ ኩዌት እና ኳታር በሚገኙ የአሜሪካ የጦር ሰፈሮች ላይ መጠነ-ሰፊ የሚሳኤል እና የድሮን ጥቃት ሰነዘረች

 
ሐምሌ 03 ቀን 2018(መናኸሪያ ሬዲዮ) ባለፉት ሶስት ሳምንታት ሰፍኖ የነበረውን የተኩስ አቁም ስምምነት ተከትሎ፣ አሜሪካ በኢራን ደቡባዊ እና ምስራቃዊ ግዛቶች ላይ በሰነዘረችው አዲስ የአየር ድብደባ ምክንያት ቀጠናው ዳግም ወደ ከባድ ውጥረት ውስጥ ገብቷል። የኢራን እስላማዊ አብዮታዊ ዘብ (IRGC) የአሜሪካ የባህር ኃይል አምስተኛ ፍሊት ዋና መነሻ በሆነችው ባህሬን የሚገኙ የነዳጅ ማከማቻዎችን፣ በኩዌት የሚገኘውን የፓትሪዮት የአየር መከላከያ ስርዓት እና በኳታር የሚገኝ የቅድመ-ማስጠንቀቂያ ሳተላይት መገናኛ ጣቢያን በድሮንና በሚሳኤል መምታቱን በይፋ አስታውቋል።
 
ይህ የኢራን ድንገተኛ የአጸፋ እርምጃ የተቀሰቀሰው አሜሪካ በኢራን የባህር ጠረፍ እና በምስራቅ ግዛቶች በሚገኙ ስትራቴጂካዊ ይዞታዎች ላይ ላለፉት ሁለት ተከታታይ ቀናት ከፍተኛ የአየር ድብደባ መፈጸሟን ተከትሎ ነው። በአሜሪካ ድብደባ ምክንያት በሰኔ ወር አጋማሽ ላይ ተደርሶ የነበረው ደካማ የተኩስ አቁም ስምምነት ሙሉ በሙሉ የፈረሰ ሲሆን፣ ዋሽንግተን ለጥቃቱ መነሻ ያደረገችው ኢራን በሆርሙዝ ባህረ ሰላጤ በሚንቀሳቀሱ የንግድ መርከቦች ላይ ጥቃት በመሰንዘር ስምምነቱን ጥሳለች የሚል ክስ ነው።
 
በአሁኑ ሰዓት በኩዌት፣ ባህሬን እና ኳታር የሚገኙ የጸረ-ሚሳኤል መከላከያ ዘዴዎች ጥቃቱን ለማክሸፍ በከፍተኛ ሁኔታ ስራ ላይ መዋላቸው የተሰማ ሲሆን፣ ሁለቱም ወገኖች ወታደራዊ እርምጃዎቻቸውን አጠናክረው እንደሚቀጥሉ በማስጠንቀቃቸው ቀውሱ ወደ መላው መካከለኛው ምስራቅ ሊስፋፋ እንደሚችል ከፍተኛ ስጋት ፈጥሯል።
 
__

ሀሳብ እና’ሳ’ፍራለን