መስከረም 15 ቀን 2019 ዓ.ም (መናኸሪያ ሬዲዮ) የኢትዮጵያ ኤሌክትሪክ አገልግሎት በኮሙዩኒኬሽን ሥራ አስፈፃሚው በአቶ አንዋር አብራር በኩል ባወጣው ይፋዊ የሚዲያ መግለጫ፣ ፍትሃዊ የኤሌክትሪክ ተደራሽነትን ለማረጋገጥ ባከናወነው ሰፊ ሥራ በጉራጌ ዞን በእኖር እና እዣ ወረዳዎች የሚገኙ 19 የገጠር መንደሮችን በበዓሉ ዋዜማ የኤሌክትሪክ ተጠቃሚ ማድረጉን አስታውቋል። ቀድሞም ቢሆን በደማቅ የመስቀል በዓል አከባበሩ የሚታወቀው አካባቢው፣ አሁን ደግሞ በእነዚህ መንደሮች ኤሌክትሪክ መግበቡ የበዓሉን አከባበር ይበልጥ ያሳምረዋል ተብሏል። ይህን የኤሌክትሪክ መስመር ዝርጋታ ለማከናወን ከ132 ሚሊዮን ብር በላይ ወጪ የተደረገ ሲሆን፣ ለሥራው ስኬትም 25.92 ኪሎ ሜትር መካከለኛ እና 38 ኪሎ ሜትር ዝቅተኛ የኤሌክትሪክ መስመር ዝርጋታ ተከናውኗል። በፕሮጀክቱ 2 ሺህ 295 የሚጠጉ ቆጣሪዎች የተገጠሙ ሲሆን፣ በአንድ ቆጣሪ አማካይ 5 የቤተሰብ አባላት ተጠቃሚ ይሆናሉ ተብሎ በተሰላው መሠረት 11 ሺህ 475 ዜጎችን የመብራት ባለቤት ማድረግ ተችሏል። በተጨማሪም ከወጣው አጠቃላይ ወጪ ውስጥ 40 ሚሊዮን የሚሆነው በሕብረተሰቡ ቀጥተኛ ተሳትፎና የባለቤትነት ስሜት የተሸፈነ መሆኑ የሕዝብና የተቋሙን አብሮነት ድንቅ ማሳያ እንደሆነ ተገልጿል። ይህ የልማት ሥራ የአካባቢውን ማኅበራዊና ኢኮኖሚያዊ እንቅስቃሴ በማነቃቃትና በማሳደግ ረገድ ትልቅ ሚና ከመጫወቱም በላይ፣ የዘንድሮውን የመስቀል በዓል ለነዋሪዎቹ ልዩ እንደሚያደርገው ይጠበቃል። ___ ሀሳብ እና‘ሳ‘ፍራለን
ምላሽ ይስጡ