መስከረም 14 ቀን 2019 ዓ.ም (መናኸሪያ ሬዲዮ) ለዓመታት በጉጉት ሲጠበቅ የነበረው የታይሰን ፊዩሪ እና አንቶኒ ጆሹዋ የከባድ ሚዛን የቦክስ ውድድር የሚካሄድበት ቦታ መታወቁና ስምምነት መፈረሙ ተገልጿል። የፊታችን ታህሳስ ወር በዌልስ ካርዲፍ ስታዲየም ለብዙ ዓመታት ሲጠበቅ እና ሲጠየቅ የነበረው የቦክስ ፍልሚያ ጥያቄ መልስ ያገኛል። “የብሪታንያ ፍልሚያ” ተብሎ የተሰየመው ይህ ታላቅ ግጥሚያ በታህሳስ ወር በዌልስ ካርዲፍ ከተማ በሚገኘው የፕሪንሲፓሊቲ ስታዲየም እንደሚካሄድ መወሰኑን አዘጋጆቹ በማህበራዊ ትስስር ገጻቸው ይፋ አድርገዋል። ሁለቱ የብሪታንያ ከባድ ሚዛን ቦክሰኞች በሳዑዲ አረቢያ ውሉን የተፈራረሙ ሲሆን፣ ግጥሚያው በብሪታንያ የቦክስ ታሪክ ትልቁ እንደሚሆን ይጠበቃል። የ38 ዓመቱ ታይሰን ፊዩሪ በ2024 መጨረሻ ላይ ከቦክስ ስፖርት ጡረታ መውጣቱን አስታውቆ የነበረ ቢሆንም፣ በ2026 ጥር ወር ላይ ዳግም ወደ ስፖርቱ መመለሱን ይፋ አድርጓል። ፊዩሪ በሙያዊ የቦክስ ህይወቱ 39 ፍልሚያዎችን አድርጎ 36 ድሎችን ያስመዘገበ ሲሆን፣ ከነዚህ ውስጥ 25ቱን በዝረራ ያሸነፈ ነው። ብቸኛ 2 ሽንፈቶቹ የተመዘገቡትም በ2024 ከዩክሬናዊው ኦሌክሳንደር ኡሲክ ጋር ባደረገው ጨዋታ ነው። አንቶኒ ጆሹዋ ባደረጋቸው 34 ፕሮፌሽናል የቦክስ ፍልሚያዎች 30ውን ያሸነፈ ሲሆን፣ ከእነዚያ መካከል 27ቱን በዝረራ መርታት የቻለ ቡጢኛ ነው። በቦክስ ታሪኩ 4 ጊዜ ብቻ የተሸነፈ ሲሆን፣ ዩክሬናዊው ኡሲክ 2 ጊዜ አሸንፎታል። ሁለቱንም ተፋላሚዎች መርታት የቻለ ብቸኛው ሰው ዩክሬናዊው ኡሲክ ሲሆን፣ ከእሱ ውጪ አንዲ ሩዊዝ እና ዳንኤል ዱቧም የጆሹዋን የሽንፈት ጽዋ እንዲጎነጩ ያደረጉ ሌሎች ቡጢኞች ናቸው። ምንም እንኳን ከዚህ ቀደም በ2021 ሁለቱ ቦክሰኞች እንዲፋለሙ ጥረት ተደርጎ በተለያዩ ምክንያቶች ሳይሳካ ቢቀርም፣ የአሁኑ ስምምነት ግን ለዓመታት የቆየውን ጥበቃ የሚያበቃ ሆኗል። ___ ሀሳብ እና‘ሳ‘ፍራለን
ምላሽ ይስጡ