መስከረም 13 ቀን 2019 ዓ.ም (መናኸሪያ ሬዲዮ) «የምድር ጌጥ ኢትዮጵያ» በሚል ርዕስ ሲካሄድ የቆየው ታሪካዊና ባህላዊ አውደ ርዕይ የመጎበኛ ጊዜ፣ ከህዝብ የቀረበውን ከፍተኛ ፍላጎትና ጥያቄ መነሻ በማድረግ ለተጨማሪ ሶስት ሳምንታት መራዘሙ የዝግጅቱ አዘጋጅ «የሐመረ ብርሃን የብራና መጻሕፍት ሥራ ድርጅት» አስታዉቋል፡፡ አውደ ርዕዩ ከዚህ ቀደም ከነሐሴ 28 እስከ መስከረም 10 ቀን ሲካሄድ የነበረ ቢሆንም፣ በወቅቱ የነበሩ የሃይማኖታዊና የባህላዊ በዓላት መደራረብ እንዲሁም ከቦታ ምቾት ጋር ተያይዘው የነበሩ ችግሮች የጎብኚዎችን ቁጥር እንደገደበዉ ድርጅቱ ገልጻል፡፡ በአዲስ አበባ ከተማ ተዘጋጅቶ የቀረበው ይህ አውደ ርዕይ፤ ህፃናትና ቤተሰቦች የሀገራቸውን፣ የሃይማኖታቸውን፤ የቅዱሳት ቤተክርስቲያናትን ታሪክና ቅርሶች በቅርበት የሚያውቁበትን እድል የፈጠረ ነው ተብሏል። ዝግጅቱም በማየት፣ በመዳሰስ፣ በመስማት፣ በማሸተትና በመቅመስ አምስቱንም የስሜት ሕዋሳት በሚያሳትፍ ልዩ አቀራረብ የተዘጋጀ ሲሆን፤ የላሊበላ፣ የአክሱም፣ የደብረ ዳሞና የሌሎችም ታሪካዊ ቦታዎች ምስልና ቅርሶች ቀርበውበታል። በተጨማሪም በቦታው ላይ በርካታ ታሪካዊና ባህላዊ ይዘቶች በመኖራቸው፤ አውደ ርዕዩን ወደፊት «ቋሚ ሙዚየም» ለማድረግ የሚያስችል ሥራ በጥረት ላይ እንደሚገኝ ተጠቅሷል። በዚሁ መሠረት አውደ ርዕዩ ከመስከረም 30 ቀን ጀምሮ እስከ ጥቅምት ወር አጋማሽ ድረስ ባሉት ተከታታይ ሶስት ሳምንታት፤ በየሳምንቱ ቅዳሜና እሁድ ለጎብኚዎች ክፍት ሆኖ እንደሚቀጥል ተገልጿል። አስተባባሪዎቹ አክለውም፤ እስካሁን አውደ ርዕዩን ያላዩ ህፃናትና ቤተሰቦች ከጦር ኃይሎች ወደ ቀራኒዮ በሚወስደው መንገድ ላይ በሚገኘው «ሆላንድ ፓርክ» በመገኘት ይህንን ታሪካዊ አጋጣሚ እንዲጠቀሙ ጥሪ አቅርበዋል። ___ ሀሳብ እና‘ሳ‘ፍራለን
ምላሽ ይስጡ