መስከረም 11 ቀን 2019 ዓ.ም (መናኸሪያ ሬዲዮ) በቤኒሻንጉል ጉሙዝ ክልል ከሚገኙ 5 ነባር ብሔረሰቦች መካከል አንዱ የሆነው የቦሮ ሺናሻ ብሔረሰብ ቋንቋ የመጥፋት አደጋ ላይ በመሆኑ የመንግሥትን ትኩረት እንደሚሻ የአካባቢው ተወላጅና ፖለቲከኛው ዶ/ር መብራቱ አለሙ ለመናኸሪያ ሬዲዮ ተናግረዋል። እያንዳንዱ አርሶ አደር ቢያንስ አንድ ዲግሪ ያለው ልጅ ያለው መሆኑ የቦሮ ሺናሻን ማኅበረሰብ ልዩ ያደርገዋል የሚሉት ዶክተር መብራቱ፣ የብሔረሰቡ ምሁራን ቋንቋውን ለማስቀጠል የማስተዋወቅና የምርምር ሥራ ይጠበቅባቸዋል ብለዋል። መንግሥት ለብሔር ብሔረሰቦች መብት፣ እኩልነትና ባህላቸውን ለማስተዋወቅ የሚያደርገው ድጋፍ አበረታች ቢሆንም፣ ባህል፣ ወግና ቋንቋቸው የመጥፋት አደጋ ለተጋረጠባቸው ብሔረሰቦች ልዩ ትኩረት በመስጠት ጥናት ማድረግ እንደሚገባው ፖለቲከኛው ገልጸዋል። በተለይ ከብሔረሰቡና ከክልሉ ውጪ ለሚኖሩ የብሔረሰቡ ተወላጆች ቋንቋውን በማስተላለፍና በማስቀጠል ረገድ የባህልና ስፖርት ሚኒስቴርን ትኩረት እንደሚሻ ዶክተር መብራቱ ተናግረዋል። እንደ ማኅበረሰብ አናሳ ከሚባሉት መካከል የቦሮ ሺናሻ ብሔረሰብ ተጠቃሽ ቢሆንም አናሳነቱ በቁጥር እንጂ በባህል ሀብት አይደለም የሚሉት በቤኒሻንጉል ጉሙዝ ክልል የቦሮ ሺናሻ ብሔረሰብ የባህልና ሀብት አሰባሳቢ ኮሚቴ ኃላፊ አቶ በላይ አፋ ናቸው። የባህልና ስፖርት ሚኒስቴር አሁን ከሚያደርገው ድጋፍ በተጨማሪ የብሔረሰቡን ቋንቋ የመጠበቅና የማስተዋወቅ ሥራ ሊሠራ እንደሚገባው ገልጸዋል። ብሔር ብሔረሰቦች በመዲናዋ ባህላቸውንና የዘመን መለወጫ ሥርዓታቸውን እንዲያከብሩ ከመፍቀድና ከማገዝ በተጨማሪ ቋንቋና ባህላቸው የመጥፋት አደጋ ለተጋረጠባቸው በጥናት ላይ የተመሠረተ ሥራ በመሥራት መጠበቅ እንደሚገባም ተመልክቷል። የቦሮ ሺናሻ ብሔረሰብ የዘመን መለወጫ ክብረ በዓል ከመስከረም 11 እስከ መስከረም 18 ባሉት ቀናት እየተከበረ ይውላል። ___ ሀሳብ እና‘ሳ‘ፍራለን
ምላሽ ይስጡ