በሸዋሮቢት ከተማና አካባቢው የተከሰተውን የግሪሳ ወፍ በቁጥጥር ሥር ማዋል መቻሉ ተገለጸ

መስከረም 12 ቀን 2019 ዓ.ም (መናኸሪያ ሬዲዮ) የሸዋሮቢት ከተማ አስተዳደር ግብርና ጽሕፈት ቤት በአካባቢው አጥፊው የግሪሳ ወፍ መከሰቱን መግለጹ ይታወቃል። በጉዳዩ ላይ መናኸሪያ ሬዲዮ የክልሉን ግብርና ቢሮ አነጋግሯል። በአካባቢው የተከሰተውን የግሪሳ ወፍ አደጋ እንዳያስከትል በአጭር ጊዜ መቆጣጠር መቻሉን የገለጹት በአማራ ክልል ግብርና ቢሮ የሰብል ልማትና ጥበቃ ዳይሬክተር ዶ/ር ማንደፍሮ አስላከ ናቸው፡፡ የግሪሳ ወፍ በወረርሽኝ መልክ የሚከሰት በመሆኑ ሸዋሮቢትን ጨምሮ በ5 ዞኖችና በ60 ቀበሌዎች ጭምር መታየቱን ተናግረዋል። ከግብርና ሚኒስቴር ጋር በጋራ በመሆን በአውሮፕላን የኬሚካል ርጭት መደረጉን ገልጸው፤ አሁን ላይ ጉዳት በማያስከትልበት ደረጃ መቆጣጠር መቻሉን አስታውቀዋል። የኤልኒኖ ሥጋት ባለበት በዚህ ወቅት ድርቅ፣ ያልተስተካከለ የዝናብ ስርጭትና የሰብል አጥፊ ተባዮች እንደሚከሰቱ የሚጠበቅ ነው ያሉት ዳይሬክተሩ፤ የተለያዩ ወራሪ ተባዮችን ጨምሮ የግብርናውን ሥርዓት ከሚያዛቡ ነገሮች አስቀድሞ ለመከላከል ዝግጅት እየተደረገ መሆኑን ጠቁመዋል። በክልሉ ያለው የሰብል ሁኔታ በግሪሳ ወፍ ለመበላት ያልደረሰ በመሆኑ የከፋ ጉዳት አለመድረሱን ተናግረው፤ እስካሁን የግብዓትና የኬሚካል እጥረት አለመኖሩን እንዲሁም የተጀመረው የመከላከል ሥራ ተጠናክሮ እንደሚቀጥልም አስታውቀዋል። መናኸሪያ ሬዲዮ በጉዳዩ ላይ የግብርና ሚኒስቴርን ቢጠይቅም በቅርቡ መግለጫ እንደሚሰጥበት በመግለጽ ምላሽ ሰጥቷል። ___ ሀሳብ እና‘ሳ‘ፍራለን