የመኪናዎ ጎማ ላይ ያሉትን ምስጢራዊ ቁጥሮች እና ፊደላት ያውቋቸዋል?

ነሐሴ 20 ቀን 2018 (መናኸሪያ ሬዲዮ)የመኪና ባለቤቶች እና አሽከርካሪዎች ለተሽከርካሪዎቻቸው ጎማ ሲገዙ ወይም ሲቀይሩ በጎማው ጎን (Sidewall) ላይ የተጻፉትን ቁጥሮች እና ፊደላት ትርጉም ማወቅ ለደህንነታቸው ወሳኝ መሆኑ ተገለጸ። እነዚህ ምልክቶች የጎማውን መጠን፣ የመሸከም አቅም፣ የፍጥነት ወሰን እና የተመረተበትን ጊዜ የሚገልጹ መረጃዎች ናቸው።
 
ለአብነት ያህል P205/55R16 91V የሚለውን የጎማ ላይ ምልክት ብንመለከት የመጀመሪያው ፊደል P ጎማው ለሰው ማጓጓዣ (Passenger Vehicle) የተሰራ መሆኑን የሚያሳይ ሲሆን LT ከሆነ ደግሞ ለቀላል ጭነት (Light Truck) የሚያገለግል ነው።
 
ቀጥሎ ያለው 205 የጎማውን ጎን ለጎን ስፋት በሚሊሜትር ይገልጻል፤ ቁጥር 55 ደግሞ የጎማው ቁመት ከስፋቱ ጋር ያለውን ንፅፅር በመቶኛ ያሳያል። R የሚለው ፊደል የውስጥ ሽቦዎቹ በክብ የተቀመጡበት (Radial) መሆኑን የሚያመለክት ሲሆን ቁጥር 16 ደግሞ ጎማው የሚገጠምበት ሪም መጠን በኢንች ነው።
 
በመቀጠል የሚመጣው ቁጥር 91 ጎማው በነጠላ የመሸከም አቅሙን የሚያሳይ ኮድ ሲሆን ይህም እስከ 615 ኪሎ ግራም መሸከም እንደሚችል ያመለክታል። ከጎኑ ያለው V ፊደል ደግሞ ጎማው በደህና ሁኔታ መጓዝ የሚችለውን ከፍተኛ የፍጥነት ወሰን የሚያሳይ ሲሆን እስከ 240 km/h የሚያስኬድ መሆኑን ያብራራል። H (210 km/h) እና T (190 km/h) ሌሎች አብዛኛውን ጊዜ የሚታዩ የፍጥነት ወሰን ምልክቶች ናቸው።
 
በጎማው ላይ DOT ከሚለው ጽሁፍ መጨረሻ የሚገኘው ባለ 4 ዲጂት ቁጥር የተመረተበትን ሳምንት እና ዓመት ያሳያል። ለምሳሌ 1223 የሚለው ምልክት ጎማው በ2023 በ12ኛው ሳምንት የተመረተ መሆኑን ያመለክታል። ጎማ ምንም እንኳን ጥቅም ላይ ባይውል ከ5 እስከ 6 ዓመታት በላይ ከቆየ የመለጠጥ አቅሙ ስለሚቀንስ ለአደጋ ሊያጋልጥ እንደሚችል ባለሙያዎች ይመክራሉ።
 
__

ሀሳብ እና’ሳ’ፍራለን