በጦርነት ቀጠናዎች ለመለየት አስቸጋሪ የሆኑትን የፕላስቲክ ፈንጂዎች በቀላሉ የሚያጋልጠው አዲስ ድሮን ተሰራ

 
ሐምሌ 03 ቀን 2018(መናኸሪያ ሬዲዮ)በአሜሪካው ቢንግሃምተን ዩኒቨርሲቲ የሚገኙ ተመራማሪዎች፣ በተለምዶ “ቢራቢሮ” እየተባሉ የሚጠሩትን እና በብረታ ብረት መመርመሪያዎች ለመለየት እጅግ አስቸጋሪ የሆኑትን የፕላስቲክ ፈንጂዎች በቀላሉ መለየት የሚችል በአርቴፊሻል ኢንተለጀንስ የሚመራ የድሮን ሲስተም ይፋ አድርገዋል። ይህ አዲስ ሲስተም ከተለመዱት የብረት መመርመሪያ መሳሪያዎች በተለየ መልኩ፣ መደበኛ የድሮን ካሜራዎችን ብቻ በመጠቀም ከምድር በላይ ከ10 እስከ 20 ሜትር ከፍታ ላይ እየበረረ የፕላስቲክ ፈንጂዎችን በምስል ለይቶ የማወቅ ከፍተኛ አቅም አለው።
 
ድሮኑ የሚቀርጻቸውን ምስሎች በሰከንዶች ውስጥ ለመተንተን ‘YOLO’ የተሰኘውን እጅግ ፈጣን የአርቴፊሻል ኢንተለጀንስ አልጎሪዝም የሚጠቀም ሲሆን፣ ይህ የኤአይ ሲስተም በተለያዩ መሬቶች፣ የብርሃን አማራጮች እና የዕይታ ማዕዘኖች ላይ ያሉትን ፈንጂዎች በትክክል እንዲለይ በእውነተኛ የልምምድ ፈንጂዎች እና በ3ዲ ፕሪንት በተሰሩ አምሳያዎች አማካኝነት ከፍተኛ ስልጠና ተሰጥቶታል።
 
የቴክኖሎጂው ሌላው አስደናቂ ጥንካሬ ደግሞ አጠቃላይ ሲስተሙ ያለምንም የኢንተርኔት ግንኙነት ወይም የጂፒኤስ ሲግናል ቀላል ክብደት ባለው ላፕቶፕ ላይ ብቻ መሥራት መቻሉ ሲሆን፣ ይህም የኮሙዩኒኬሽን መስመሮች በተቋረጡባቸው ወይም የሲግናል ማደናቀፊያ ባለባቸው አስቸጋሪ የጦርነት ቀጠናዎች ላይ በነፃነት ለመጠቀም ፍጹም ምቹ ያደርገዋል።
 
ተመራማሪዎቹ እንዳስታወቁት፤ ይህ ቴክኖሎጂ በዋናነት የተሰራው ሰብአዊ እርዳታ የሚያቀርቡ የፈንጂ ቡድኖች የሰው ኃይል ወደ አደገኛ እና ገዳይ ቦታዎች ከማሰማራታቸው በፊት፣ ፈንጂ የተጠመደባቸውን ቀጠናዎች አስቀድመው ከሩቅ ሆነው በከፍተኛ ደህንነት እና በፍጥነት መለየት እንዲችሉ ለማገዝ ነው ተብሏል።
 
 __

ሀሳብ እና’ሳ’ፍራለን