ግንቦት 12 ቀን 2018(መናኸሪያ ሬዲዮ) የዓለም ፖለቲካ ትኩረት አሁንም በቻይና መናገሻ ከተማ ላይ ያረፈ ሲሆን የቻይናው ፕሬዚዳንት ሺ ጂንፒንግ የአሜሪካውን ፕሬዚዳንት ዶናልድ ትራምፕን በታላቁ የሕዝብ አዳራሽ ካስተናገዱ ከጥቂት ቀናት በኋላ፣ የሩሲያውን ፕሬዚዳንት ቭላድሚር ፑቲንን በዚሁ ታሪካዊ ሥፍራ በደማቅ ወታደራዊ ክብር ተቀብለዋል።
የቻይና ወታደሮች፣ የጦር ኃይሎች የሙዚቃ ባንድ እና የሩሲያና ቻይናን ባንዲራዎች የሚያወገረግቡ ሕፃናት በቤጂንግ መሃል ለፕሬዚዳንት ፑቲን ከፍተኛ ክብር የታየበት አቀባበል አድርገውላቸዋል። በመቀጠልም ሁለቱ መሪዎች በጠበበ እና በሰፊው የልዑካን ቡድን መዋቅር የፊት ለፊት ውይይት ያደረጉ ሲሆን በውይይቱም ላይ የንግድ እና የኢነርጂ ትብብር፣ የዩክሬን ጦርነት፣ የመካከለኛው ምስራቅ ቀውስ እንዲሁም በቻይና እና ሩሲያ መካከል ስላለው ስልታዊ አጋርነት በሰፊው መክረዋል።
በዚህ ታሪካዊ ስብሰባ ላይ ፕሬዚዳንት ቭላድሚር ፑቲን ሩሲያ ለቻይና ምንጊዜም አስተማማኝ የኢነርጂ አቅራቢ ሆና እንደምትቀጥል በድጋሚ ያረጋገጡ ሲሆን በሌላ በኩል ፕሬዚዳንት ሺ ጂንፒንግ ዓለም አቀፉ ማኅበረሰብ ወደ ጫካ ሕግ እንዳይመለስ እና የኃያላን ፍላጎት በደካሞች ላይ እንዳይጫን ጠንካራ ማስጠንቀቂያ ሰጥተዋል። አክለውም በመካከለኛው ምስራቅ በአስቸኳይ የተኩስ አቁም ስምምነት እንዲደረግ ጥሪ አቅርበዋል።
ይህ በሞስኮ እና በቤጂንግ መካከል ያለው ወዳጅነት በደመቀበት በዚሁ ዕለት፣ ቻይና ከዋሽንግተን ጋር ያላትን ግንኙነት ለማመጣጠን ትልቅ እርምጃ መውሰዷን አረጋግጣለች። ቤጂንግ ሁለት መቶ የቦይንግ አውሮፕላኖችን ለመግዛት ማቀዷን ይፋ ያደረገች ሲሆን፣ ከአሜሪካ ጋር ያለውን የንግድ ስምምነት ለማራዘም ፍላጎት እንዳላት ገልጻለች። ይህ እርምጃ ቻይና በሞስኮ እና በዋሽንግተን መካከል ያላትን የዲፕሎማሲ እና የንግድ ሚዛን በጥንቃቄ እየጠበቀች መሆኑን ለዓለም ያሳየችበት ትልቅ ኩነት ሆኖ ተመዝግቧል።
__
ሀሳብ እና’ሳ’ፍራለን
ምላሽ ይስጡ