ግንቦት 04 ቀን 2018(መናኸሪያ ሬዲዮ) አሜሪካ የኒውክሌር ጦር መሣሪያዎቿን ባትጠቀም እንኳ፣ በሰዓታት ውስጥ የትኛውንም የዓለም ክፍል ማሽመድመድ የምትችልባቸው ግዙፍ ወታደራዊ አማራጮች እንዳሏት ይነገራል። ከአቶሚክ ቦምቦች በስተጀርባ ዋሽንግተን የምትመካባቸውና የዓለምን ኃይል ሚዛን የዘወሩት ዋነኛ አቅሞች ሲተነተኑም አስገራሚ ውጤቶች ታይተዋል።
አሜሪካ በዓለም ውቅያኖሶች ላይ የምታሰማራቸው የአውሮፕላን ተሸካሚ መርከቦች “ተንቀሳቃሽ የጦር ሰፈሮች” በመባል የሚታወቁ ሲሆን፣ አንዷ መርከብ ብቻ ከአነስተኛ አገራት አየር ኃይል የሚበልጡ ከ80 በላይ ዘመናዊ የጦር አውሮፕላኖችን ተሸክማ የጠላትን ደጃፍ የማንኳኳት አቅም አላት። ይህ ኃይል አሜሪካ የትኛውንም አገር በባህር ዳርቻው በኩል ለመቆለፍ የምትጠቀምበት ዋነኛ መሣሪያዋ ሆኖ ያገለግላል።
ከዚህም ባሻገር የአሜሪካ አየር ኃይል የራዳር እይታን ሰብረው የሚገቡ የ”ስውር ቴክኖሎጂ” ቴክኖሎጂ ውጤቶች የሆኑትን F-22 እና F-35 የጦር አውሮፕላኖች እንዲሁም B-2 ቦምብ ጣዮችን የታጠቀ ሲሆን፣ እነዚህ አውሮፕላኖች ጠላት ሳያያቸው ቁልፍ የጦር ዕዞችን የማውደም ልዩ ብቃት አላቸው። በጠፈር ላይ የተዘረጋው የሳተላይት መረብ ማንኛውንም እንቅስቃሴ በንቃት ከመከታተሉም በላይ፣ “ስማርት” ቦምቦች ኢላማቸውን ስንጥቅ ሳይስት እንዲመቱ ያደርጋል።
በዓለም ዙሪያ በሚገኙ ከ800 በላይ የጦር ሰፈሮቿ አማካኝነት አሜሪካ በየትኛውም የምድር ክፍል ጦርነት ቢነሳ በአጭር ጊዜ ውስጥ ግዙፍ ኃይል የማንቀሳቀስ ብቸኛ የሎጂስቲክስ አቅም ያላት አገር ናት። ከወታደራዊ ጥቃቱ ጎን ለጎንም የጠላትን የኢንተርኔት፣ የኤሌክትሪክ እና የባንክ ሥርዓት በሳይበር ጥቃት በማሽመድመድ አገራትን ያለ ጥይት ከጥቅም ውጭ የማድረግ ስልታዊ የበላይነት አላት ነው የተባለው።
የፖለቲካ ተንታኞች እንደሚሉት ከሆነ የአሜሪካ እውነተኛ ጥንካሬ የኒውክሌር ክምችቷ ሳይሆን፣ በማንኛውም ጊዜና ቦታ ሊተገበር የሚችለው ይህ ዘመናዊና ፈጣን የወታደራዊ ቴክኖሎጂ ስብስቧ ነው።
__
ሀሳብ እና’ሳ’ፍራለን
ምላሽ ይስጡ