መስከረም 15 ቀን 2019 ዓ.ም (መናኸሪያ ሬዲዮ) በሃገር ጉዳይ ላይ ያገባናል የሚል ዜጋ ሁሉ በቅድሚያ የሃገርን ሰላም ማስጠበቅና የመልካም አስተዳደር ጥያቄዎችን ማንሳት እንደሚገባ ያመላከቱት የሕብር ኢትዮጵያ ዴሞክራሲያዊ ፓርቲ ሊቀመንበር አቶ ግርማ በቀለ ናቸው፡፡ የልዩነት ጥያቄዎችን በሰለጠነ መልኩ በማንሳት የህዝብን ሰላም መጠበቅ ላይ ሁሉም የድርሻውን ሊወጣ እንደሚገባ አክለው፣ በግጭቶች ምንም አይነት መፍትሔ ማምጣት ስለማይቻል ለሰላም ቅድሚያ ሊሰጥ ይገባል ብለዋል፡፡ ኢትዮጵያ ላለፉት 50 አመታት ባልተረጋጋ ሁኔታ ውስጥ እንድታልፍና በአንዳንድ አካባቢዎች አለመረጋጋቶች እንዲፈጠሩ ያደረገው፣ ሃገራዊ የሆኑ መግባባቶች ላይ ትኩረት ባለማድረጋችን መሆኑን ገልጸው፣ አሸናፊነት በሃይል ላይ የተመሰረተ ከሆነ ለውጥ ማምጣት ስለማይቻል ወጣቶች፣ የሲቪል ማህበራት፣ የፖለቲካ ፓርቲዎችና በመንግስት በኩል ለሰላም ቅድሚያ መስጠት እንደሚገባ አስምረውበታል፡፡ ሠላም የሁሉም ነገር መሰረት እንደሆነና ከጦርነት የምናተርፈው ነገር እንደሌለ የገለፁት ደግሞ ሌላኛው ‹የአዲስ ትውልድ ፓርቲ› ፕሬዝዳንትና የኦሮምያ የጋራ ምክር ቤት ዋና ሰብሳቢ ሰለሞን ታፈሰ፣ ጦርነት ንብረት ከማውደም፣ ህዝብን በስነ-ልቦናና በአካል ከመጉዳት ውጭ ትርፍ ስለሌለው እርቅን ማስቀደም ይገባል ብለዋል፡፡ በሃሳብ አለመግባባቶች ምክኒያት አዛውንቶች እንዲሰደዱ ህፃናት እንዳይማሩና ንብረት እንዲወድም ምክኒያት እንዳንሆን የፖለቲካ ፓርቲዎች፣ ወጣቶችና የሃይማኖት አባቶች በሙሉ ሃላፊነታቸውን መወጣት እንዳለባቸው አስገንዝበዋል፡፡ ከግጭት የምናተርፈው ነገር ስለሌለ በሃገር አቀፍ ደረጃ ሰላምን ለማስፈን ሁሉም አካል በያገባኛል ስሜት ሊሰራ እንደሚገባ ፓርቲዎቹ አመላክተዋል፡፡ ___ ሀሳብ እና‘ሳ‘ፍራለን
ምላሽ ይስጡ