በጥምረት ስም የሀገር ሰላምና አንድነት እንዳይታወክ ፓርቲዎችና መንግስት ከህዝብ ጋር በጋራ ሊሰሩ ይገባል ተባለ

 መስከረም 12 ቀን 2019 ዓ.ም (መናኸሪያ ሬዲዮ) በጥምረት ስም ወደ ተጨማሪ ግጭት የሚያመሩ ድርጊቶችን ለሀገር አንድነትና ሰላም ሲባል ማስቆም እንደሚገባ ለመናኸሪያ ሬዲዮ ሃሳባቸውን ያሳፈሩ ፓርቲዎች ተናግረዋል። ምርጫ እና ምክክር ያደረገችው ኢትዮጵያ ሰላምና አንድነቷ ተጠብቆ ሊቆይ ይገባል ሲሉ የጉሙዝ ህዝብ ዲሞክራሲያዊ ንቅናቄ ፓርቲ ስራ አስፈጻሚ ዶ/ር መኮንን ጉላሳ ለመናኸሪያ ሬዲዮ ተናግረዋል። ዛሬም ሆነ ወደፊት እንደ ሀገር የሚጠቅመው በውይይትና በሀገራዊ አንድነት መስራት ብቻ እንደሆነ ስራ አስፈጻሚው ገልጸዋል። ሀገር በትጥቅ ትግል የምትለወጥበትና የምታተርፍበት ጊዜ አልፏል ያሉ ሲሆን፣ የጥምረት ሃይሎችን መንግስት ከህዝብ ጋር ሆኖ መቆጣጠርና ሰላምና የሀገርን አንድነት አስጠብቆ መዝለቅ ላይ ትኩረት ማድረግ እንደሚገባም አስገንዝበዋል። የጥምረቱ አካል ነው በማለት በማህበራዊ ሚዲያ የፓርቲያቸውን ስም ሲያነሱ የቆዩም እንዳሉ የጠቀሱት ስራ አስፈጻሚው ፓርቲያቸው ከመሰል እንቅስቃሴዎች የራቀ እና በህጋዊ መንገድ ተወዳድሮ ስልጣን አግኝቶ ህዝብን እያገለገለ እንደሚገኝም ተናግረዋል። ይሁንና በቤኒሻንጉል ጉሙዝ ክልል ውስጥ አንዳንድ ወጣቶችን አባብሎ የጥምረቱ አካል የማድረግ እንቅስቃሴዎች ሳይኖሩ እንዳልቀሩ ግምታቸዉን ገልጸዋል።  ይከናወናል የተባለው ጥምረት ከገሃዱ እውነታ ጋር ሲታይ አንዳንዶቹ ፓርቲዎች እሳቤና የትግል ሃሳብ እርስ በእርሱ የሚቃረን መሆኑን ጠቁመዋል። አክለዉም የህዝብ ሰላም እንዳይነካ ሌሎች ፓርቲዎች ከፌደራል መንግስት ጎን ቆመው ሊሰሩ እንደሚገባም ስራ አስፈጻሚው አስገንዝበዋል።   ህዝብ እንዲህ ባለው ያልተረጋገጠና መልክ ያልያዘ ትብብር ምክንያት ሊወሰድና የሃሳቡም ተቀባይ መሆን የለበትም ሲሉ ሃሳባቸውን የገለጹት ደግሞ  የአፋር ሕዝብ ፍትሐዊ ዲሞክራሲያዊ ፓርቲ (አሕፍዲፓ) ስራ አስፈጻሚ አባል ሱመያ መሃመድ ናቸው።   አክለዉም መንግስትና የፖለቲካ ፓርቲዎች ሰላምና መረጋጋት እንዲሁም ሀገራዊ አንድነት ላይ ብቻ መስራት እንደሚገባቸው ገልጸዋል። የታጣቂ ሃይሎችና መሰል አጎራባች ሃይሎች ጥምረት ዘለቄታዊም ህጋዊም መሰረት አለው ብለው እንደማያምኑም ጠቅሰዋል። በአፋር ክልል በኩል የጥምረቱ አካል ሆነው የቀረቡ ፓርቲዎች ስለመኖራቸው መረጃው እንደሌላቸውም አክለው ገልጸዋል።   የኢትዮጵያ ህዝብ ሀገራዊ ምክክር አድርጎ ሁለንተናዊ መፍትሄ በሚሽትበት ማግስት እንዲህ ያሉ አዋኪ ጥምረቶችን በመስማት እንዳይረበሽ መንግስትና ሀገራዊ አንድነት ላይ የሚሰሩ ፓርቲዎች ሃላፊነታቸውን ሊወጡ ይገባል ሲሉ ፓርቲዎች አመላክተዋል። ___ ሀሳብ እና‘ሳ‘ፍራለን