ደቡብ ሱዳን በዓባይ ወንዝ ላይ ግድብ ለመገንባት መወሰኗ በግብፅ በኩል የነበረውን የውኃ አጠቃቀም የበላይነትና ጫና በጋራ ለመጋራት የሚረዳ ነው ተባለ

መስከረም 12 ቀን 2019 ዓ.ም (መናኸሪያ ሬዲዮ) በዓባይ ወንዝ ላይ የሚገነቡ የኃይል ማመንጫ ግድቦች በታችኞቹ የተፋሰሱ ሀገራት ላይ ተጽዕኖ ቢኖራቸውም፣ በትብብር ከተመሩ ለቀጠናው ትልቅ ጥቅም እንደሚሰጡ የታላቁ ሕዳሴ ግድብ የኢትዮጵያ ተደራዳሪ ኢንጅነር ጌዲዮን አስፋው ገልጸዋል። ውሳኔው የኢትዮጵያን ሀገራዊ የኃይል አቅርቦት ለማስፋፋት፣ የኤሌክትሪክ ተዳራሽነትን ለማረጋገጥ እና ትርፍ ኃይልን ለጎረቤት ሀገራት በመሸጥ የውጭ ምንዛሬ ለማስገኘት ከፍተኛ ፋይዳ እንዳለው ይናገራሉ። ደቡብ ሱዳን በላይኛው ናይል ተፋሰስ ላይ ግድብ ለመገንባት የምታደርገው እንቅስቃሴ የናይል ተፋሰስ የትብብር ማዕቀፍ ስምምነትን (CFA) መሠረት ያደረገ መሆኑን የታላቁ ሕዳሴ ግድብ ተደራዳሪ አቶ ፈቅአሕመድ ነጋሽ ተናግረዋል፡፡ ውሳኔው እስካሁን በግብፅ በኩል የነበረውን የውኃ አጠቃቀም የበላይነትና ጫና በጋራ ለመጋራት እንዲሁም ፍትሐዊ አጠቃቀምን ለማስፈን ትልቅ አስተዋጽኦ እንዳለው ጠቁመዋል። ለኢትዮጵያ በዲፕሎማሲና በልማት ዘርፍ ድጋፍ የሚሰጥ ከመሆኑም በላይ፣ ሌሎች የተፋሰሱ ሀገራትም ወደ ተመሳሳይ የልማት እንቅስቃሴዎች እንዲገቡ መንገድ የሚከፍት በመሆኑ ለቀጠናው ከፍተኛ ፋይዳ እንዳለው ገልጸዋል። በሌላ በኩል ደቡብ ሱዳን በናይል ወንዝ ላይ ግድብ ለመገንባት የወሰደችው ውሳኔ ብሔራዊ ጥቅሟን የሚያስጠብቅና የተፈጥሮ ሀብቷን የመጠቀም ሉዓላዊ መብቷን የሚያረጋግጥ መሆኑን የዲፕሎማሲ ባለሙያው አምባሳደር ጥሩነህ ዜና ገልጸዋል። ውሳኔው ከኢትዮጵያም ሆነ ከሌሎች የዓባይ ተፋሰስ ሀገራት የጋራ ስምምነት ጋር የሚጣጣም መሆኑን የጠቆሙት አምባሳደሩ፤ ግድቡ መገንባቱ ሀገራት የተፈጥሮ ሀብታቸውን በሉዓላዊነት የመጠቀም መብታቸውን የሚያጠናክር እና የጋራ ተጠቃሚነት መርሕን የሚያጎለብት ነው ብለዋል። የግድቡ መገንባት የደቡብ ሱዳንን ብሔራዊ ጥቅም ከማስጠበቅ ባለፈ፣ ሌሎች የዓባይ ተፋሰስ ሀገራትንም በጋራ ተጠቃሚ የሚያደርግ መሆኑ ተመላክቷል። ___ ሀሳብ እና‘ሳ‘ፍራለን