መስከረም 11 ቀን 2019 ዓ.ም (መናኸሪያ ሬዲዮ) የኢትዮጵያ መገናኛ ብዙኃን ባለሥልጣን በትግራይ ቴሌቪዥን (Tigray TV) ላይ ከዛሬ ጀምሮ ላልተወሰነ ጊዜ የሚቆይ እገዳ መጣሉን ባወጣው ጋዜጣዊ መግለጫ አስታወቀ። ባለሥልጣኑ በመግለጫው እንዳስታወሰው፣ በኢፌዴሪ መንግሥት እና በሕወሓት መካከል በፕሬቶሪያ የተፈፀመውን የሰላም ስምምነት ተከትሎ ከትግራይ ክልል ጊዜያዊ አስተዳደር ጋር ባደረገው ውይይትና በተደረሰበት ስምምነት መሠረት ቀደም ሲል በትግራይ ቴሌቪዥን ላይ ተጥሎ የነበረው እገዳ ተነስቶ ወደ ሥራ መመለሱ ይታወቃል። ከዚህም በተጨማሪ ባለሥልጣን መሥሪያ ቤቱ ለትግራይ ቴሌቪዥን ጋዜጠኞችና ባለሙያዎች የሰላም ግንባታና የሙያ ብቃት ማሳደጊያ ሥልጠናዎችን በመስጠት ሚዲያው ወደ ሕገ-መንግሥታዊና ሙያዊ መስመር እንዲመለስ ያላሰለሰ ጥረት ሲያደርግ ቆይቷል። ሆኖም ከቅርብ ጊዜ ወዲህ የትግራይ ቴሌቪዥን በተሰጠው ዕድል ተጠቅሞ እና የሙያ ሥነ-ምግባር አክብሮ አገልግሎት መስጠት ሲገባው፣ የሀገርንና የሕዝብን ደህንነት እንዲሁም ብሔራዊ ጥቅምን አደጋ ላይ የሚጥሉ፣ ወደ ግጭት የሚገፋፉ እና ፅንፈኝነትን የሚያበረታቱ መልእክቶች በተከታታይ እየተላለፉበት እንደሚገኝ በተደረገው የሚዲያ ይዘት ክትትልና ግምገማ ማረጋገጡን ባለሥልጣኑ ገልጻል። በመሆኑም በሕግ የተጣለበትን ኃላፊነት መሠረት በማድረግ ጣቢያው ላይ ይህንን እገዳ ለመጣል መወሰኑን አስታውቋል። በመጨረሻም ማንኛውም ዲጂታል፣ ብሮድካስትም ሆነ የሕትመት ሚዲያ የትግራይ ቴሌቪዥንን እንደ መረጃ ምንጭ መጠቀም ወይም የቴሌቪዥን ጣቢያው በሕገ-ወጥ መንገድ የሚያሰራጫቸውን ይዘቶች አሰራጭቶ ወይም አስተጋብቶ መገኘት በጥብቅ የተከለከለ መሆኑን ባለሥልጣኑ አሳስቧል። ይህንን መመሪያ ተላልፎ በሚገኝ ማንኛውም ሚዲያ ላይ ባለሥልጣን መሥሪያ ቤቱ አስፈላጊውን ሕጋዊና አስተዳደራዊ እርምጃዎች የሚወስድ መሆኑን አጥብቆ አሳስቧል። ___ ሀሳብ እና‘ሳ‘ፍራለን
ምላሽ ይስጡ