መስከረም 11 ቀን 2019 ዓ.ም (መናኸሪያ ሬዲዮ) በሀገሪቱ ከሚገኙ አካል ጉዳተኞች መካከል 11.8 በመቶ ያህሉ ብቻ የትምህርት ዕድል እንደሚያገኙ የኢትዮጵያ ዓይነ ስውራን ብሔራዊ ማኅበር ለመናኸሪያ ሬዲዮ አስታውቋል፡፡ ችግሩን ለመቅረፍ ሁሉም ባለድርሻ አካላት ኃላፊነታቸውን ሊወጡ እንደሚገባ የማኅበሩ የሕዝብ ግንኙነት ኃላፊ አቶ ገብሬ ተሾመ ተናግረዋል። የትምህርት ዕድል ያላገኙ ሕፃናትና አካል ጉዳተኞች ቁጥር ከፍተኛ እንደሆነና ሽፋኑ አሁንም ዝቅተኛ መሆኑን ቁጥራዊ መረጃዎች እንደሚያሳዩም ገልጸዋል። ወላጆች አካል ጉዳተኛ ልጆቻቸውን ወደ ትምህርት ገበታ ከመላክ አንጻር ክፍተት እንዳለባቸው የተናገሩት ኃላፊው፤ ወላጆች ይህንን ችግራቸውን በመቅረፍ ልጆቻቸውን የማስተማር ቀዳሚ ኃላፊነት እንዳለባቸው መዘንጋት የለባቸውም ብለዋል። የትምህርት ዘርፉ ኃላፊዎችና ባለሙያዎችም በሚያካሂዱት የቅኝትና የቁጥጥር ሥራ ወቅት፤ በየአካባቢው ካሉ አካል ጉዳተኞች ምን ያህሉ ትምህርት ቤት እንደገቡ ሊከታተሉና አስፈላጊውን እርምጃ ሊወስዱ እንደሚገባ ተናግረዋል፡፡ ማኅበሩ ከአዲስ አበባ ከተማ አስተዳደር፣ ከአማራ እና የማዕከላዊ ኢትዮጵያ ሕዝቦች ክልሎች ትምህርት ቢሮዎች ጋር በመተባበር ያሳተማቸውን የብሬል መጻሕፍት ለዓይነ ስውራን ተማሪዎች ተደራሽ ቢያደርግም በቂ እንዳልሆነ የሚናገሩት አቶ ገብሬ፤ የማኅበሩ ግዴታ መንግሥት ይህንን እንዲያሟላ መጠየቅ ቢሆንም፣ አንዳንድ የመንግሥት አካላት ሳይቀሩ ማኅበሩ እንዲያሟላ ሲጠይቁ ይስተዋላል ብለዋል። የትምህርት ሚኒስቴርን ጨምሮ የክልል ትምህርት ቢሮዎች ለዓይነ ስውራን ተማሪዎች የሚያስፈልጉ የትምህርት ግብዓቶችን በሚፈለገው ልክ ማቅረብ እንዳለባቸው ጠቁመዋል፡፡ የአካል ጉዳተኞችና የመምህራን ማኅበራትን ጨምሮ ሌሎችም የሚመለከታቸው አካላት፣ አካል ጉዳተኞች እንደማንኛውም ዜጋ የትምህርት ዕድል እንዲያገኙ በማድረግ ረገድ ኃላፊነታቸውን ሊወጡ ይገባል ብለዋል። ___ ሀሳብ እና‘ሳ‘ፍራለን
ምላሽ ይስጡ