መስከረም 09 ቀን 2019ዓ.ም.(መናኸሪያ ሬዲዮ) ባንኩ ከታክስ በፊት 4.3 ቢሊዮን ብር ትርፍ ሲያስመዘግብ፣ ጠቅላላ ሀብቱም 111.3 ቢሊዮን ብር መድረሱን አስታውቋል። ባንኩ ከዚህ በፊት ባካሄደው 33ኛ መደበኛ እና 16ኛ አስቸኳይ የባለአክሲዮኖች ጠቅላላ ጉባኤ ላይ 4.3 ቢሊዮን ብር ትርፍ ማድረጉንና ጠቅላላ ገቢው የ21 በመቶ እድገት በማስመዝገብ 16.4 ቢሊዮን ብር መድረሱን ገልጿል፡፡ እ.ኤ.አ. የ2025-26 በጀት ዓመት የአፈፃፀም ሪፖርት ያቀረቡት የባንኩ የዳይሬክተሮች ቦርድ ሰብሳቢ አቶ አብዲሹ ሁሴን፣ የባንኩ የሂሳብ ሚዛን እና የካፒታል አቅም እያደገ መምጣቱን እንዲሁም የባንኩን መደበኛ ስራዎች የሚያቀላጥፉ ቴክኖሎጂ መር ፕሮጀክቶች መተግበራቸውን ገልፀዋል:: የቦርድ ሰብሳቢው አክለውም ባንኩ በበጀት ዓመቱ ያጋጠሙትን የተለያዩ ዓለም አቀፋዊ እና ሀገራዊ ተግዳሮቶች በመቋቋም በፋይናንስና ፋይናንስ ነክ ባልሆኑ የአፈፃፀም መለኪያዎች አመርቂ ውጤት ማስመዝገቡን ጠቅሰዋል። የባንኩ ጠቅላላ ሀብት ሰኔ 30 ቀን 2026 ዓ.ም. 111.3 ቢሊዮን ብር የደረሰ ሲሆን፣ ይህም ካለፈው ተመሳሳይ ወቅት ከነበረው 84.3 ቢሊዮን ብር ጋር ሲነፃፀር የ32 በመቶ ዕድገት ያሳየ መሆኑን አቶ አብዲሹ ገልፀዋል። በተመሳሳይም የባንኩ ተቀማጭ ገንዘብ 81.3 ቢሊዮን ብር መድረሱን ጠቅሰው፣ ይህም ካለፈው በጀት ዓመት 66.2 ቢሊዮን ብር ጋር ሲነፃፀር የ23 በመቶ ዕድገት ማስመዝገቡን በመጠቆም ባንኩ በበጀት ዓመቱ ጠንካራ የሀብት ማሰባሰብ እንቅስቃሴ ማድረጉን እንደሚያሳይ ተናግረዋል፡፡ በተያያዘም ባንኩ በበጀት ዓመቱ 366 ሚሊዮን የአሜሪካ ዶላር የውጭ ምንዛሪ ያገኘ መሆኑን የጠቀሱት አቶ አብዲሹ፣ ይህ አፈፃፀም እ.ኤ.አ. ከ2024-25 በጀት ዓመት ጋር ሲነፃፀር የ34 በመቶ ዕድገት እንዳለው ገልፀዋል። ባንኩ ለተለያዩ የኢኮኖሚ ዘርፎች የሰጠው ጠቅላላ ብድርም በተጠናቀቀው በጀት ዓመት የ26 በመቶ እድገት በማስመዝገብ 67.3 ቢሊዮን ብር መድረሱን ጠቅሰዋል፡፡ ባንኩ የቀጣይ ዓመታት የአዲሱን የዳይሬክተሮች ቦርድ የሥራ ድርሻ ያስቀመጠ ሲሆን፣ የዲጂታል አሰራርን ማስፋፋት፣ የአሰራር መዋቅርን ማሳደግ፣ እንዲሁም የዓለም አቀፍ የፋይናንስ ስርዓትን መከተልና መተግበር ዋና ዋናዎቹ እንደሆኑ ተመላክቷል። ___ ሀሳብ እና‘ሳ‘ፍራለን
ምላሽ ይስጡ