ነሐሴ 20 ቀን 2018 (መናኸሪያ ሬዲዮ)የመኪና ባለቤቶች እና አሽከርካሪዎች ለተሽከርካሪዎቻቸው የሞተር ዘይት ሲገዙ ወይም ሲቀይሩ በዘይቱ መያዣ ላይ የተጻፉትን ቁጥሮች እና ፊደላት ትርጉም ማወቅ የሞተሩን እድሜ ለማራዘም ወሳኝ መሆኑ ተገለጸ። እነዚህ ምልክቶች የዘይቱን ውፍረትና ቅጥነት (Viscosity)፣ የአየር ንብረት ተስማሚነት እና የአለም አቀፍ የጥራት ደረጃ የሚገልጹ መረጃዎች ናቸው።
ለአብነት ያህል SAE 5W-30 API SP የሚለውን የሞተር ዘይት ላይ ያለ ምልክት ብንመለከት ትርጉሙ እንደሚከተለው ይብራራል፦
የውፍረትና ቅጥነት መጠን (Viscosity Grade – SAE)
የመጀመሪያው 5W የሚያመለክተው ዘይቱ በብርድ ወይም በቅዝቃዜ ወቅት ያለውን የቅጥነት ደረጃ ነው። W የሚለው ፊደል Winter (ክረምት/ቅዝቃዜ) የሚለውን የሚያስረዳ ሲሆን ከ W በፊት ያለው ቁጥር አነስተኛ በሆነ መጠን ዘይቱ በቅዝቃዜ ወቅት በፍጥነት በመፍሰስ ሞተሩ ሲነሳ ወዲያውኑ የመጠበቅ አቅሙ ከፍተኛ ይሆናል።
ከዳሽ ( – ) በኋላ ያለው 30 ቁጥር ደግሞ ሞተሩ በከፍተኛ ሙቀት ውስጥ በሚሰራበት ወቅት የሚኖረውን የዘይት ውፍረት ያሳያል። ይህ ቁጥር ከፍ ባለ ቁጥር ዘይቱ በከፍተኛ ሙቀት ውስጥ ውፍረቱን ሳይለቅ የመጠበቅ አቅሙ የጎላ ይሆናል።
በመቀጠል የሚገኘው API SP የሚለው ምልክት የሰሜን አሜሪካው የፔትሮሊየም ኢንስቲትዩት የጥራት ማረጋገጫ ነው። API ከሚለው ጽሁፍ ቀጥሎ የሚመጣው የመጀመሪያው ፊደል S ከሆነ ዘይቱ ለቤንዚን (Petrol) ሞተር የተሰራ መሆኑን የሚያሳይ ሲሆን C ከሆነ ደግሞ ለዲዘል (Diesel) ሞተር የሚያገለግል ነው።
ከ S ወይም C ቀጥሎ የሚመጣው ሁለተኛው ፊደል (ለምሳሌ SP) የቴክኖሎጂውን አዲስነትና የጥራት ደረጃ ያመለክታል። በፊደላት ቅደም ተከተል መሰረት ሁለተኛው ፊደል ወደ Z በጠጋ ቁጥር ዘይቱ ዘመናዊና ከፍተኛ የሞተር መከላከል አቅም ያለው መሆኑን ያረጋግጣል።
በተጨማሪም በዘይቱ መያዣ ላይ Full Synthetic የሚል ጽሁፍ ካለ ዘይቱ በላቦራቶሪ የተሰራና ረጅም ርቀት የሚያስኬድ ሲሆን፤ Semi-Synthetic ከሆነ ደግሞ ሰው ሠራሽ እና የተፈጥሮ ዘይት ቅልቅል ነው። Mineral Oil የሚለው ደግሞ ከተፈጥሮ ድፍድፍ ነዳጅ የተጣራና በየአጭር ርቀቱ መለወጥ የሚኖርበት መሆኑን ባለሙያዎች ያስረዳሉ።
__
ሀሳብ እና’ሳ’ፍራለን
ምላሽ ይስጡ