በቤትዎ ውስጥ የሚያዩት ግዙፍ ሸረሪት ጥቃት አድራሽ ሳይሆን የቤቶ ዘበኛ ሊሆን ይችላል ተባለ

 
ነሐሴ 07 ቀን 2018 (መናኸሪያ ሬዲዮ)በክፍልዎ ግድግዳ ላይ ግዙፍ ሸረሪት ተንጠልጥሎ ሲያዩ የመጀመሪያ ምላሽዎ በጫማ መምታት ሊሆን ይችላል፤ ነገር ግን ይህ ግዙፍ ሸረሪት ሳያውቁት ትልቅ ውለታ እያደረገልዎ ሊሆን ይችላል ነው የተባለው።
 
በሳይንሳዊ ስሙ Sparassidae በሚባል የሸረሪት ቤተሰብ ውስጥ የሚመደበው እና «ሃንትስማን» (Huntsman Spider) በመባል የሚታወቀው ይህ ፍጡር፣ በተለይም በሞቃታማ ሀገራት በብዛት በየመኖሪያ ቤቶች ውስጥ ይገኛል። አስፈሪ በሚመስለው ግዙፍ አካሉ እና ረጅም እግሮቹ ቢታወቅም፣ ፍጡሩ ለሰው ልጅ አደገኛ ወራሪ ሳይሆን ፈጣን እና ደፋር የነፍሳት አዳኝ ነው።
 
ድር በማሰራት ሰለባቸውን ከሚጠብቁ ሌሎች ሸረሪቶች በተለየ መልኩ፣ የሃንትስማን ሸረሪቶች በምሽት በግድግዳዎች፣ በኮርኒሶች እና በጨለማ ማዕዘናት ላይ በመዘዋወር ጎጂ ነፍሳትን ያድናሉ። ከፍተኛ የዕይታ አቅማቸውን፣ ፍጥነታቸውን እና ቅጽበታዊ ጥቃታቸውን በመጠቀም በቤት ውስጥ የሚገኙ እንደ በረሮ፣ ትንኝ፣ ዝንብ፣ ክሪኬት እና ትናንሽ የቤት እንስሳትን (እንደ ቲክቲክ ያሉ) ከመስመጣቸው በፊት አድነው ይመገባሉ።
 
ይህ ሸረሪት መርዝ ቢኖረውም፣ መርዙ የሚያገለግለው የሚይዛቸውን ነፍሳት ለማደናዘዝ ብቻ በመሆኑ በሰው ልጅ ላይ የጎላ የጤና እክል አያደርስም። በተጨማሪም አደጋ ሲጋረጥበት ከማጥቃት ይልቅ የመሸሽ ባህሪ ስላለው የሰው ልጅን የመንከስ አጋጣሚው በጣም አነስተኛ ነው ተብሏል።
 
ወደ ቤትዎ የሚገባውም ቤትዎ ለነዚህ ሸረሪቶች የሚያስፈልጋቸውን መጠለያ፣ ሙቀት እና ያልተቋረጠ የነፍሳት ምግብ ስለሚያቀርብላቸው ነው። በቤትዎ ውስጥ በረሮዎች ወይም ሌሎች ነፍሳት ካሉ፣ እርስዎ ከማየትዎ በፊት ሸረሪቱ ቀድሞ አግኝቷቸዋል ማለት ነው።
 
ስለሆነም እነዚህን ሸረሪቶች ማጥፋት ተገቢ አይደለም የተባለ ሲሆን፤ ምክንያቱም ያለ ምንም ኬሚካል የቤት ውስጥ ተባዮችን የሚቀንሱ ጠቃሚ አዳኞች ናቸው። በማይፈልጉበት ቦታ ላይ ካገኟቸው በመምታት ከመግደል ይልቅ፣ በቆርቆሮ ወይም በወረቀት በጥንቃቄ በመያዝ ወደ ውጭ አውጥቶ መልቀቁ ተመራጭ ነው ተብሏል።
 
ቀጣይ ጊዜ በግድግዳዎ ላይ ግዙፍ ሸረሪት ሲያዩ እርስዎን ፍለጋ ሳይሆን ከካቢኔዎ ጀርባ የተደበቀውን በረሮ ለማደን እንደሆነ ያስታውሱ። አንዳንዴ አስፈሪ የሚመስለው የቤት ውስጥ እንግዳ፣ በስራው ላይ በጣም ትጉህ ዘበኛ ሊሆን ይችላል ነው የተባለው።
 
__

ሀሳብ እና’ሳ’ፍራለን