🚨 ሰበር ዜና፦ በሞስኮ ሰማይ ላይ የድሮን ውሽንፍር! ዩክሬን በሁለት ዓመት ውስጥ ታይቶ የማይታወቅ ከፍተኛ ጥቃት ፈጸመች

ሰኔ 11 ቀን 2018(መናኸሪያ ሬዲዮ) ዩክሬን ላለፉት ሁለት ዓመታት ካደረገቻቸው ጥቃቶች ሁሉ እጅግ ግዙፍ የሆነውን የድሮን ጥቃት በሩሲያ ዋና ከተማ ሞስኮ እና በተለያዩ ግዛቶች ላይ ሰንዝራለች። የሩሲያ መከላከያ ሚኒስቴር በሰጠው ይፋዊ መግለጫ፣ ወደ ዋና ከተማዋ ሞስኮ ያመሩ 194 ድሮኖችን ጨምሮ በአጠቃላይ በአገሪቱ የአየር ክልል ውስጥ 555 የዩክሬን ድሮኖችን ማክሸፉን አስታውቋል።

💥 የደረሱ ጉዳቶች እና የበረራ መስተጓጎል

ይህ መጠነ-ሰፊ ጥቃት በሩሲያ ላይ ከፍተኛ መደናገጥን የፈጠረ ሲሆን ስትራቴጂካዊ በሆኑ ቦታዎች ላይ ጉዳት አድርሷል። በጥቃቱ ምክንያት በሞስኮ የሚገኘው ግዙፍ የነዳጅ ማጣሪያ ፋብሪካ (Moscow Oil Refinery) የተመታ ሲሆን በተለያዩ መሰረተ ልማቶች ላይም ከፍተኛ የእሳት አደጋዎች ተቀስቅሰዋል።

በተጨማሪም በሞስኮ ዓለም አቀፍ የአየር ማረፊያዎች ላይ ከባድ የበረራ መስተጓጎል የተፈጠረ ሲሆን በርካታ በረራዎች እንዲሰረዙ ወይም መስመራቸውን እንዲቀይሩ ተገደዋል።

በበይነመረብ ላይ በፍጥነት እየተሰራጩ ያሉ ተንቀሳቃሽ ምስሎች በጥቃቱ የደረሰውን አስገራሚ ትዕይንት በግልጽ ያሳያሉ።

ጥቅጥቅ ያለ ጥቁር ጢስ ወደ ሰማይ ሲገነፍል እና በአንድ ትልቅ የነዳጅ ማከማቻ ታንክ ላይ ከፍተኛ ፍንዳታ ሲከሰት በቪዲዮው ላይ ይታያል።

ከተመቱት ድሮኖች የወረደው ፍርስራሽም በአንድ የመኖሪያ ህንፃ እና የአካል ብቃት እንቅስቃሴ ማዕከል ላይ ወድቆ ከባድ ጉዳት አድርሷል ነው የተባለው።

🗣️ “ሙሉ በሙሉ ተገቢ የሆነ ምላሽ ነው” — ፕሬዝዳንት ዘለንስኪ

የዩክሬኑ ፕሬዝዳንት ቮሎዲሚር ዘለንስኪ ለህዝባቸው በሰጡት መግለጫ፣ ይህ ወታደራዊ ዘመቻ ሩሲያ በዩክሬን ከተሞችና ንጹሃን ዜጎች ላይ ለምታደርገው ተከታታይ ጥቃት “ሙሉ በሙሉ ተገቢ የሆነ ምላሽ” ነው ብለውታል። ዘለንስኪ አክለውም ጥቃቱ በክሬምሊን ላይ የሚደረገውን ጫና ለመጨመር እና የሩሲያን ወታደራዊ አቅም ለማዳከም የታለመ መሆኑን አስገንዝበዋል።

የሩሲያ አስቸኳይ የአጸፋ ምላሽ እና የኔቶ ስብሰባ

ሩሲያ በጥቃቱ ማግስት ወዲያውኑ የሃይል እርምጃ የወሰደች ሲሆን፣ 7 ሚሳኤሎችን እና 239 ድሮኖችን ወደ ዩክሬን ከተሞች በመተኮስ ከባድ የአየር ጥቃት ሰንዝራለች። ይህ በእንዲህ እንዳለ፣ የሰሜን አትላንቲክ ጦር ኪዳን (NATO) መሪዎች በሁለቱ አገራት መካከል እየተባባሰ የመጣውን ውጥረት ተከትሎ አስቸኳይ ስብሰባ በማድረግ ላይ ናቸው። መሪዎቹ ለኪየቭ የሚሰጠውን ተጨማሪ ወታደራዊ ድጋፍ እና ዘመናዊ የአየር መከላከያ ስርዓቶችን ስለማጠናከር በምክክር ላይ እንደሚገኙ ታውቋል።

__

ሀሳብ እና’ሳ’ፍራለን