🚨 ሰበር ዜና፦ በአሜሪካ የቢ-52 ቦምብ ጣይ አውሮፕላን ተከስክሶ የ8 ሰዎች ህይወት አለፈ!

ሰኔ 09 ቀን 2018(መናኸሪያ ሬዲዮ) በአሜሪካ ካሊፎርኒያ ግዛት ውስጥ በሚገኘው የኤድዋርድስ የአየር ኃይል እዝ ውስጥ እጅግ አስከፊ የአየር አደጋ ተከስቷል። የአሜሪካ አየር ኃይል ኩራት እና ስትራቴጂካዊው ግዙፉ የቢ-52 (B-52 Stratofortress) ቦምብ ጣይ አውሮፕላን የሙከራ በረራ እያደረገ ባለበት ወቅት በድንገት ተከስክሶ የሰምንት ሰዎች ህይወት በአሰቃቂ ሁኔታ አልፏል። ወታደራዊ ባለስልጣናት በአውሮፕላኑ ውስጥ የነበሩ ሁሉም ስምንት ሰዎች ህይወታቸው ማለፉን በይፋ አረጋግጠዋል።
 
አደጋው የደረሰው ሰኞ ጠዋት በአካባቢው ሰዓት አቆጣጠር 11 ሰዓት ከ20 ደቂቃ ላይ ሲሆን፣ ቦታው ከሎስ አንጀለስ በስተሰሜን በሚገኘው ታዋቂው የኤድዋርድስ አየር ኃይል ማረፊያ ማኮብኮቢያ አቅራቢያ ነው። በአውሮፕላኑ ውስጥ የነበሩትና ህይወታቸውን ያጡት ሰዎች ድብልቅ የሆኑ የወታደራዊ አባላት፣ የኮንትራት ሰራተኞች እና የቦይንግ ኩባንያ ባለሙያዎች እንደነበሩ ተገልጿል።
 
አውሮፕላኑ አዲስ የተገጠመለትን የራዳር ማዘመኛ ሲስተም ለመፈተሽ መደበኛ የሙከራ በረራ እያደረገ የነበረ ሲሆን፣ ልክ እንደተነሳ ወዲያውኑ ተከስክሶ በእሳት ተውጧል። ከአደጋው የተረፈ ምንም ነገር እንደሌለና ከአካባቢው እጅግ ግዙፍ ጥቁር ጭስ ወደ ሰማይ ሲያርግ እንደነበር የአየር ላይ ምስሎች አሳይተዋል።
 
የኤድዋርድስ አየር ኃይል እዝ ምክትል አዛዥ ኮሎኔል ጄምስ ሄይስ በሰጡት መግለጫ አደጋው ማንም ሊተርፍበት የማይችል አይነት እጅግ አሰቃቂ እንደነበር ገልጸው፣ ስምንት ታላላቅ አሜሪካውያንን በማጣታቸው የተሰማቸውን ጥልቅ ሀዘን ገልጸው ሃሳባቸውና ጸሎታቸው ከሟች ቤተሰቦች ጋር መሆኑን አስታውቀዋል።
 
የአቪዬሽን ደህንነት ባለሙያዎች አውሮፕላኑ እንደተነሳ ወዲያውኑ መከስከሱ የቁጥጥር ስርአት ብልሽት ሊሆን እንደሚችል ቢገምቱም፣ የአሜሪካ አየር ኃይል ለአደጋው መንስኤ የሚሆን እስካሁን ያገኘው ፍንጭ እንደሌለና ጥልቅ ምርመራ ለማድረግ እስከ ስድስት ወር ሊፈጅ እንደሚችል አስታውቋል።
 
ቦይንግ ቢ-52 ከ1950ዎቹ ጀምሮ በአሜሪካ የጦር ሰራዊት ውስጥ ከፍተኛ አገልግሎት እየሰጠ ያለ፣ ሁለቱንም የተለመዱና የኑክሌር መሣሪያዎችን መሸከም የሚችል ግዙፍና ረጅም ርቀት ተጓዥ ስትራቴጂካዊ የጦር አውሮፕላን ነው።
__

ሀሳብ እና’ሳ’ፍራለን