ስታለቅሱ በአፍንጫችሁ ውሃ መሰል ፈሳሽ ለምን ይፈሳል?👉 ከአይናችን እስከ አፍንጫችን የተዘረጋው አስደናቂ የተፈጥሮ መስመር!

ሕዳር 02 ቀን 2019(መናኸሪያ ሬዲዮ) አይናችንን ስንታጠብ፣ ስንስቅ ወይም ደግሞ በተለያዩ ምክንያቶች ስናለቅስ ከአይናችን በሚወጣው እንባ እኩል አፍንጫችንም መፍሰስ ይጀምራል።

ይህ ሁኔታ በድንገት የሚከሰት ይመስላል እንጂ በሰውነታችን ውስጥ በተዘረጋው አስደናቂ የፍሰት መስመር ምክንያት የሚፈጠር ግልጽ የተፈጥሮ ሂደት ነው።

እያንዳንዱ ሰው በሁለቱም አይኖቹ የላይኛው እና የታችኛው የክንፍ ጠርዞች ውስጠኛ ክፍል ላይ ጥቃቅን የሆኑ የፈሳሽ መውረጃ ቀዳዳዎች አሉት።

በህክምናው አለም ላክሪማል ፑንክታ (Lacrimal Puncta) ተብለው የሚጠሩት እነዚህ ቀዳዳዎች ለአይናችን እንደ ጥቃቅን የፍሳሽ ማስወገጃ በመሆን ያገለግላሉ።

ይህ ሂደት የሚጀምረው ከአይናችን በላይ ባለው ክፍተት ውስጥ የሚገኘው የእንባ እጢ (Lacrimal Gland) አይናችን እንዳይደርቅና ከቆሻሻ እንዲጠበቅ ሁልጊዜም አስፈላጊውን እርጥበት በማመንጨት ነው።

የተመረተው እንባ የአይንን ገጽታ ካራሰ እና ካጸዳ በኋላ በእነዚህ ጥቃቅን የላክሪማል ፑንክታ ቀዳዳዎች በኩል ወደ ውስጥ ይሰበሰባል።

በመቀጠል እንባው ቀዳዳዎቹን አልፎ ካናሊኩሊ (Canaliculi) በተባሉ ጥቃቅን ማስተላለፊያ ቱቦዎች በኩል ወደ ላክሪማል ከረጢት (Lacrimal Sac) ይጓዛል። በመጨረሻም ፈሳሹ ከዚሁ ከረጢት ተነስቶ ናሶላክሪማል ቱቦ (Nasolacrimal Duct) በሚባለው ዋና መስመር በኩል በቀጥታ ወደ አፍንጫችን የውስጥ ክፍል ይወርዳል።

በተፈጥሮ ሁኔታ አይናችን ትንሽ እንባ ሲያመነጭ ፈሳሹ ከአፍንጫችን እርጥበት ጋር ተቀላቅሎ ሳይታወቀን ይተናል ወይም ወደ ውስጥ ይወርዳል።

ነገር ግን ከፍተኛ ሀዘን ወይም ደስታ አጋጥሞን አምረን ስናለቅስ የእንባው መጠን ከቀዳዳዎቹ የመያዝ አቅም በላይ ስለሚሆን ፈሳሹ በከፍተኛ ሁኔታ በዚህ የተፈጥሮ መስመር ወደ አፍንጫ ይጎርፋል፤ በዚህም ምክንያት አፍንጫችን መፍሰስ እና መንጠባጠብ ይጀምራል።

__

ሀሳብ እና’ሳ’ፍራለን