መስከረም 09 ቀን 2019ዓ.ም.(መናኸሪያ ሬዲዮ) በኢትዮጵያ 2.9 ሚሊየን ድጋፍ የሚሹ ተረጂዎች እንዳሉ የኢትዮጵያ የአደጋ ስጋት ስራ አመራር ኮምሽን መረጃ አመላክቷል። የአደጋ ስጋት ምላሽ ፈንድ በድንገተኛ አደጋዎች ጊዜ የውጭ እርዳታ ጥገኛ ከመሆን ይልቅ በሀገር ውስጥ አቅም ፈጣን ምላሽ ለመስጠት በአዋጅ የተቋቋመ የገንዘብ ማሰባሰቢያ ሥርዓት መሆኑ ይታወቃል። ፈንዱ ከቴሌኮም እና ባንክ አገልግሎቶች ክፍያ፣ ከሎተሪ አገልግሎት፣ ከአክስዮን ክፍፍል፣ ከኬሚካል ሽያጭ፣ ከፓስፖርት፣ ቪዛ፣ ንግድ ፈቃድ አገልግሎቶች እና ከሌሎችም አማራጮች የሚሰበሰብ ነው። በኢትዮጵያ የአደጋ ስጋት ስራ አመራር ኮምሽን ስር በሚተዳደረው በዚህ “የአደጋ ስጋት ምላሽ ፈንድ” በ6 ወር ውስጥ 15.5 ቢሊየን ብር እንደተሰበሰበ ኮምሽኑ ባዘጋጀው መድረክ ላይ ተገልጿል። ከተሰበሰበው የገንዘብ መጠን ውስጥ 4.9 ቢሊየን ብር ለአደጋ ጊዜ ምግብ ግዢ እንደዋለም ተገልጿል። በኢትዮጵያ የአደጋ ስጋት ስራ አመራር ኮምሽን መረጃ መሰረት በኢትዮጵያ ውስጥ 2.9 ሚሊየን ድጋፍ የሚሹ ተረጂዎች ያሉ ሲሆን፣ በአደጋ ስጋት ምላሽ የሚሰበሰበው ፈንድ እነርሱን ለመደገፍ አገልግሎት ይውላል ተብሏል። ይሁን እንጂ አንዳንድ የአገር ውስጥ እና የውጭ ድርጅቶች የግል ጥቅማቸውን ማዕከል በማድረግ በኢትዮጵያ ያሉትን የተረጂዎች ቁጥር አጋነው እንደሚያቀርቡ ተመላክቷል። በኢትዮጵያ የሰብዓዊ ድጋፍ ተጠቃሚ ተብለው የተለዩ የህብረተሰብ ክፍሎች:- የእለት ደራሽ እርዳታ ፈላጊዎች፣ የከተማ ልማታዊ ሴፍቲኔት ተጠቃሚዎች፣ በተፈጥሮ እና ሰው ሰራሽ አደጋዎች የተፈናቀሉ፣ ጎዳና ተዳዳሪዎችና በየቦታው የሚኖሩ ዜጎች፣ የገጠር ልማታዊ ሴፍቲኔት ተጠቃሚዎች እንዲሁም የኢኮኖሚ ችግር ያለባቸው የስደት ተመላሾች መሆናቸው ተገልጿል። ___ ሀሳብ እና‘ሳ‘ፍራለን
ምላሽ ይስጡ