ግንቦት 06 ቀን 2018(መናኸሪያ ሬዲዮ) የአሜሪካው ፕሬዝዳንት ዶናልድ ትራምፕ እና የቻይናው ፕሬዝዳንት ዢ ጂንፒንግ በቤጂንግ ባደረጉት ታሪካዊ መድረክ እጅግ ሞቅ ያለና ወዳጃዊ በሆነ መንፈስ መገናኘታቸው ተዘገበ። ሁለቱ መሪዎች በታላቁ የሕዝብ አዳራሽ በነበራቸው ቆይታ በሁለቱ ኃያላን አገራት መካከል ያለውን ግንኙነት ማጠናከር በሚቻልባቸው መንገዶች ላይ ትኩረት አድርገዋል። ፕሬዝዳንት ትራምፕ በንግግራቸው ወቅት ቻይና ላደረገችላቸው ደማቅ አቀባበል ምስጋናቸውን አቅርበው፣ ወደፊት ለሚኖረው የንግድና የኢንቨስትመንት ትብብር አዎንታዊ ተስፋ እንዳላቸው ገልጸዋል።
በተመሳሳይ ፕሬዝዳንት ዢ ጂንፒንግ በበኩላቸው ቻይና እና አሜሪካ ያላቸው ትብብር ለዓለም ሰላምና መረጋጋት ወሳኝ መሆኑን አጽንኦት ሰጥተዋል። መሪዎቹ በተለይ በንግድ ልውውጥ፣ በቴክኖሎጂ ሽግግር እና በጋራ የኢንቨስትመንት ዕድሎች ዙሪያ ሰፊ ውይይት የጀመሩ ሲሆን፣ በሁለቱ አገራት መካከል የሚታዩ የኢኮኖሚ ልዩነቶችን በውይይትና በስምምነት ለመፍታት ቁርጠኝነታቸውን አሳይተዋል። ይህ ሞቅ ያለ መንፈስ የታየበት ግንኙነት በዓለም አቀፍ ገበያ ላይ አዎንታዊ መነቃቃትን እየፈጠረ ይገኛል።
ፕሬዝዳንት ዢ ጂንፒንግ አሜሪካ እና ቻይና አብረው የሚሰሩ ከሆነ በዓለም ላይ የማይፈታ ችግር እንደማይኖርና ይህ አዲስ የታሪክ ምዕራፍ መጀመሪያ መሆኑን ገልጸዋል።
ይህ በቤጂንግ እየተካሄደ ያለው ከፍተኛ ጉባኤ በሁለቱ አገራት መካከል ለዓመታት የቆየውን የንግድ ውጥረት ለማርገብና አዲስ የኢኮኖሚ ትብብር ለመፍጠር ትልቅ ዕድል ተደርጎ ተወስዷል። በንግድ እና በኢንቨስትመንት ዙሪያ የሚደረጉት ንግግሮች በቀጣዮቹ ቀናትም የሚቀጥሉ ሲሆን፣ በቢሊዮን የሚቆጠሩ ዶላሮች የሚያንቀሳቅሱ አዳዲስ የሁለትዮሽ ስምምነቶች ይፈረማሉ ተብሎ በጉጉት ይጠበቃል። የሁለቱ መሪዎች መቀራረብና ያሳዩት ወዳጃዊ ስሜት በዓለም ፖለቲካዊ መድረክ ላይ ትልቅ ግምት ተሰጥቶታል።
__
ሀሳብ እና’ሳ’ፍራለን
ምላሽ ይስጡ