ፈረንሳይ የራሷን የክሩዝ እና ባሊስቲክ ሚሳይል መከላከያ "ጋሻ" እየገነባች መሆኑ ተገለጸ

መጋቢት 14 ቀን 2018(መናኸሪያ ሬዲዮ)ፈረንሳይ የአውሮፓን ወታደራዊ ሉዓላዊነት ለማረጋገጥ እና የውጭ ጥገኝነትን ለመቀነስ የምታደርገው ጥረት አካል የሆነውን፣ የራሷን ብሔራዊ የአየር እና የሚሳይል መከላከያ ሥርዓት በከፍተኛ ደረጃ እያሳደገች መሆኑን አስታወቀች። ይህ ስትራቴጂያዊ እርምጃ አውሮፓ ከባሊስቲክ እና ከክሩዝ ሚሳይሎች የሚሰነዘሩ ጥቃቶችን በራሷ አቅም የመመከት አቅሟን ለማጠናከር ያለመ ነው።

ሀገሪቱ በአሁኑ ወቅት በአውሮፓው የሚሳይል አምራች ኤም.ቢ.ዲ.ኤ (MBDA) የበለጸጉትን እና ዘመናዊ የሆኑትን የ”አስተር” ሚሳይሎችን በመጠቀም ላይ ትገኛለች። እነዚህ የሚሳይል ሥርዓቶች የተራቀቁ የጦር አውሮፕላኖችን፣ ሰው አልባ ድሮኖችን እና የተወሰኑ የሚሳይል አይነቶችን በአየር ላይ ለማጥፋት የሚያስችል ብቃት ያላቸው ናቸው።

ይህ አዲሱ የፈረንሳይ የ”ሚሳይል ጋሻ” እጅግ ዘመናዊ የራዳር መረቦችን፣ የቅድመ ማስጠንቀቂያ ሳተላይቶችን እና ሚሳይል አውዳሚ የሆኑ አጥፊ ሚሳይሎችን በቅንጅት በማስተሳሰር የሚሠራ ነው። ሥርዓቱ ማንኛውም የጠላት ሚሳይል ኢላማው ላይ ከመድረሱ በፊት በአየር ላይ እንዲጋይ በማድረግ አስተማማኝ ጥበቃ ይሰጣል ተብሏል።

የወታደራዊ ጉዳይ ተንታኞች እንደሚሉት፣ ፈረንሳይ የራሷን የጥበቃ ሥርዓት ማልማቷ ከአሜሪካ እና ከሌሎች የውጭ ሀገራት ቴክኖሎጂዎች የምታደርገውን ጥገኝነት በእጅጉ የሚቀንስላት ነው። ይህም ሀገሪቱ ወሳኝ በሆኑ ወታደራዊ እንቅስቃሴዎች ላይ ሙሉ በሙሉ የራሷን ቁጥጥር እንድታደርግና የአውሮፓን ቀጣናዊ ደህንነት ከአዳዲስ የአየር ላይ ስጋቶች እንድትጠብቅ ያስችላታል።

በአውሮፓ እየተለወጠ የመጣው የደህንነት ሁኔታ እና እያደጉ ያሉ የጦር መሣሪያ ስጋቶች፣ ፈረንሳይ እና አጋሮቿ የራሳቸውን ገለልተኛ የመከላከያ ግንብ እንዲገነቡ ከፍተኛ ግፊት እያደረገባቸው እንደሚገኝም ተመልክቷል።

ሀሳብ እና’ሳ’ፍራለን