የተሻሻለው የዳኝነት አገልግሎት ክፍያ ደንብ ላይ የተደረገው የአገልግሎት ክፍያ ወሰን ጭማሪ የተጋነነ ነው ሲሉ የህግ ባለሙያዎች ተናገሩ

ኅዳር 23 ቀን 2017(መናኸሪያ ሬዲዮ) የፌዴራል ፍርድ ቤቶች የዳኝነት ክፍያን ለመወሰን የወጣው ረቂቅ ደንብ የክፍያ ወሰን ጭማሪ ከሰሞኑን ለህዝብ ተወካዮች ምክር ቤት ቀርቦ መጽደቁ ይታወቃል፡፡

ለ72 ዓመታት ማሻሻያ ሳይደረግበት የቆየው፣ የፌዴራል ፍርድ ቤቶች የዳኝነት ክፍያን፣ ለማሻሻል በወጣው ደንብ እስከ 500 ፐርሰንት /5 እጥፍ/ የሚደርስ የአገልግሎት ክፍያ ጭማሪ እንደሚደረግ ተገልጿል፡፡

ከተሻሻለው የዳኝነት ክፍያ ጋር በተያያዘ መናኸሪያ ሬዲዮ ያነጋገራቸው የህግ ባለሙያዎች ክፍያው ከሀገሪቱ ነባራዊ ሁኔታ እና የዜጎች የምጣኔ ሀብት ደረጃ አንጻር ሲታይ እጅግ የተጋነነ ነው ብለዋል፡፡

የፍርድ ቤቶችን ግንባታ ጨምሮ በፍትህ ስርዓቱ የሚያስፈልጉ ስራዎችን ለመከወን ጊዜውን ያማከለ ገቢ ይገኝ ዘንድ ከ70 ዓመታት በላይ የቆየው የዳኝነት ክፍያ ደንብ መሻሻሉ አግባብ ነው የሚሉት የህግ ባለሙያው አቶ አቤነዜር ጥሩአየሁ፣ ነገር ግን በአንዴ 500 ፐርሰንት /5 እጥፍ/ ጭማሪ መደረጉ ዜጎች ካሉበት የኑሮ ደረጃ እና የመክፈል አቅም አንጻር ሲታይ የተጋነነ ነው ብለዋል፡፡

በዚህም የሚከፍሉትን በማጣት፣ ማህበረሰቡ በተገቢው መንገድ እንዳይዳኙ ሊያደርግ እና ለፍትህ ስርዓቱ ፈተና ሊሆን እንደሚችል ጠቁመዋል፡፡

ይህንኑ ሃሳብ የሚያጠናክሩት ሌላኛው የህግ ባለሙያ አቶ ይበልጣል ደሴ፣ የተሻሻለው የዳኝነት አገልግሎት ክፍያ የአብዛኛውን የማህበረሰብ ክፍል የኢኮኖሚ አቅም የሚፈትን ነው ሲሉ አክለዋል፡፡

የሚጠየቀውን ክፍያ መክፈል የማይችሉ የማህበረሰብ ክፍሎች፣ ፍርድ ቤት ሄደው ፍትህን ከማግኘት ይልቅ ያለ ፍላጎታቸው ሌሎች አማራጮችን እንዲመርጡ ያደርጋቸዋል ባይ ናቸው፡፡

ይህም አስገዳጅ ወደ ሆነ የሽምግልና እና ባህላዊ የዳኝነት ሂደት እንዲሄዱ ይገፋፋቸዋል የሚሉት የህግ ባለሙያው አንድ ዜጋ ፍርድ ቤት ቀርቦ የመዳኘት መብቱን ሊጋፋ እንሚችልም ጠቁመዋል፡፡

በዚህም የተሻሻለው የፌደራል ከፍተኛ ፍርድ ቤቶች የዳኝነት የክፍያ ደንብ ላይ የተቀመጠው፣ የክፍያ ጭማሪ ከጥቅሙ ይልቅ ጉዳቱ ያመዝናል ብለዋል፡፡

በሀገራችን በፍርድ ቤቶችም ሆነ በሌሎች አገልግሎቶች የሚደረጉ የክፍያ ማሻሻያዎች፣ የህብረተሰቡን የኑሮ ደረጃ ያማከሉ አይደሉም ሲሉ የሚሞግቱት የህግ ባለሙያዎቹ፣ የሚሻሻሉ ደንቦች እና ህጎች፣ ሀገርን እና የዜጎችን ነባራዊ ሁኔታ ታሳቢ ባደረገ መልኩ መተግበር አለባቸው ብለዋል፡፡
__

ሀሳብ እና’ሳ’ፍራለን

መናኸሪያ ሬዲዮ 99.1

ሃሳብ፣አስተያየት እና ጥቆማ ለመስጠት የሚከተሉትን የስቱዲዮ ስልኮቻችን ይጠቀሙ

👉011-639-28-52
👉011-639-37-63

የቀጥታ ስርጭት  👉 📻 (https://worldradiomap.com/et/play/menaharia) radio 99.1 (https://stream.zeno.fm/yw8poig9iwtuv)

✅ Telegram (https://t.me/menaharia_fm)

ትክክለኛውን የመናኸሪያ ሬዲዮ የዩቱዩብ አድራሻ በመቀላቀል ቤተሰብ ይሁኑ
➲  Youtube (https://www.youtube.com/channel/UC8uROsU69D8Ob65XapeHvIw)