ተመራማሪዎች በአንድ ሳምንት ውስጥ ፀጉርን ሙሉ ለሙሉ የሚያበቅል አዲስ ሞለኪውል ማግኘታቸውን አስታወቁ

👉እስከዛሬ ጥቅም ላይ ከሚውሉት መካከል የአሁኑ ግኝት እጅግ የተለየና ፈጣን ለውጥን የሚያሳይ ነው ተብሎለታል

ሐምሌ 24 ቀን 2017(መናኸሪያ ሬዲዮ)ከፀጉር መርገፍ ጋር ለሚታገሉ በሚሊዮን ለሚቆጠሩ ሰዎች ተስፋ የሚሰጥ ታላቅ ሳይንሳዊ ግኝት ይፋ ሆኗል። በካሊፎርኒያ ዩኒቨርሲቲ ሎስ አንጀለስ (UCLA) የሚገኙ ተመራማሪዎች፣ የፀጉር ሥሮችን እንደገና በማነቃቃት በአንድ ሳምንት ጊዜ ውስጥ ፀጉርን ሙሉ ለሙሉ ማብቀል የሚያስችል አዲስ ሞለኪውል ማግኘታቸውን አስታውቀዋል፡፡

ይህ አዲስ የተገኘው ሞለኪውል፣ ለፀጉር እድገት ወሳኝ የሆኑትን የፀጉር ሥሮች በማነቃቃት እንደሚሰራ ተገልጿል። የፀጉር መርገፍ የሚከሰተው የፀጉር ሥሮች እንቅስቃሴያቸውን ሲያቆሙ ወይም “ሲተኙ” ነው የተባለ ሲሆን የዩሲኤልኤ ተመራማሪዎች ያገኙት ሞለኪውል ደግሞ እነዚህን የተኙ ሥሮች ከእንቅልፋቸው በመቀስቀስ፣ አዲስና ጤናማ ፀጉር በፍጥነት እንዲያድግ ያደርጋል ተብሏል።

በቤተ ሙከራ ጥናቶች ውስጥ፣ ሞለኪውሉን ከተጠቀሙ በኋላ በአንድ ሳምንት ውስጥ ብቻ የፀጉር እድገት መታየቱ አስገራሚ ሆኗል ነው የተባለው፡፡ ይህ ፍጥነት ከዚህ ቀደም ከነበሩት የፀጉር ማብቀያ ዘዴዎች እጅግ የላቀ ነው የተባለ ሲሆን ግኝቱ በተለይ በአሎፔሺያ (alopecia) ወይም በሌሎች የጄኔቲክና የአካባቢ ሁኔታዎች ምክንያት ለሚመጣ ፀጉር መሳሳት እና መርገፍ የመጨረሻ መፍትሄ ሊሆን እንደሚችል ተስፋ ተጥሎበታል።

ይህ ግኝት በዓለም አቀፍ ደረጃ ለፀጉር መርገፍ ሕክምናና ለውበት ኢንዱስትሪ ከፍተኛ ለውጥ ሊያመጣ ይችላል ተብሎ ይጠበቃል። በአሁኑ ጊዜ የሚገኙት የፀጉር ማብቀያ ምርቶችና ሕክምናዎች ውጤታማነታቸው ውስን ሲሆን፣ አንዳንድ ጊዜም የማይፈለጉ የጎንዮሽ ጉዳቶች ሊኖራቸው ይችላል ተብሏል። የዩሲኤልኤ አዲስ ሞለኪውል ግን ፈጣንና አስተማማኝ ውጤት ስለሚያሳይ፣ ለብዙዎች ምርጫ ሊሆን እንደሚችል ተመላክቷል።

ተመራማሪዎቹ አሁን በሰው ልጆች ላይ በስፋት ጥቅም ላይ ለማዋል እየተዘጋጁ ሲሆን፣ ሞለኪውሉ ለሕዝብ በብዛት ጥቅም ላይ ከመዋሉ በፊት ተጨማሪ ጥናቶችና የቁጥጥር ማረጋገጫዎች እንደሚያስፈልጉም ገልጸዋል።

የዩሲኤልኤ ሳይንቲስቶች ያገኙት ይህ ሞለኪውል ለፀጉር መርገፍ ዘላቂ መፍትሄ ሆኖ ብቅ ማለት ከቻለ፣ በዓለም ዙሪያ በሚሊዮኖች የሚቆጠሩ ሰዎችን ሕይወት እና በራስ መተማመን በእጅጉ ይለውጣል ነው የተባለው፡፡