መስከረም 11 ቀን 2019 ዓ.ም (መናኸሪያ ሬዲዮ) በየመን ለሚገኙ ትውልደ ኢትዮጵያውያን አስፈላጊው ክትትል እየተደረገ መሆኑን የውጭ ጉዳይ ሚኒስቴር ለመናኸሪያ ሬዲዮ አስታውቋል፡፡ በየመን መንግሥት ኃይሎችና በኢራን በሚደገፉት የሑቲ ታጣቂዎች መካከል እየተካሄደ ባለው ውጊያ በርካታ ዜጎች ከየመን ወደ ጅቡቲ እየተሰደዱ መሆናቸውን የሚወጡ መረጃዎች አመልክተዋል። የተባበሩት መንግሥታት ድርጅት የስደተኞች ኤጀንሲ መረጃም በሀገሪቱ ከሚገኙና ከተመዘገቡ ስደተኞች መካከል ትውልደ ኢትዮጵያውያን በርካታ እንደሆኑ ገልጿል። በውጭ ጉዳይ ሚኒስቴር የመካከለኛው ምስራቅ፣ የእስያና ፓሲፊክ ሀገራት ጉዳዮች ዳይሬክተር አምባሳደር ደዋኖ ከድር ሚኒስቴሩ በየመን በሥጋት ውስጥ የሚገኙ ትውልደ ኢትዮጵያውያንን ጉዳይ በቅርበት እየተከታተለ መሆኑን አስታውቀዋል፡፡ በአካባቢው ያለው ሁኔታ አስቸጋሪ ቢሆንም በተቻለ መጠን ለዜጎች ለመድረስ እየተሞከረ መሆኑን ተናግረዋል፡፡ በተለይም በዜጎች ላይ ጉዳት እንዳይደርስባቸው ባሉበት እንዲቆዩና እንቅስቃሴ እንዳያደርጉ የማድረግ፣ እንዲሁም ድጋፍ እንዲያገኙ ከሚመለከታቸው አካላት ጋር በመተባበር እየተሠራ መሆኑን አምባሳደሩ ገልጸዋል፡፡ በየመን የሚገኙ የተወሰኑ ነዋሪዎችን በሚኒስቴሩ በኩል እንደሚያገኟቸው የተናገሩት አምባሳደር ደዋኖ፣ ሌሎቹንም ያሉበትን ሁኔታ ለማረጋገጥ ጥረት እየተደረገ እንደሚገኝ አመልክተዋል፡፡ በየመን እየተካሄደ ባለው ጦርነት በርካታ ዜጎች በቀይ ባሕር በኩል ወደ ጅቡቲ እየገቡ መሆኑን መረጃዎች ያመለክታሉ። ___ ሀሳብ እና‘ሳ‘ፍራለን
ምላሽ ይስጡ