ጥር 05 ቀን 2018(መናኸሪያ ሬዲዮ) የቴክኖሎጂው ግዙፍ ኩባንያ አፕል ታዋቂውን የ”ሲሪ” (Siri) ድምፅ ረዳት አገልግሎት በከፍተኛ ደረጃ ለማዘመን የጎግልን “ጄሚናይ” (Gemini) የሰው ሰራሽ አስተውሎት ሞዴሎችን ለመጠቀም መስማማቱ ተነገረ። ኩባንያዎቹ ለበርካታ ዓመታት የሚቆይ የትብብር ስምምነት መፈራረማቸው የተገለጸ ሲሆን፣ ይህም በሰው ሰራሽ አስተውሎት ዘርፍ በሁለቱ የቴክኖሎጂ ቁንጮዎች መካከል ያለውን ጥምረት ይበልጥ የሚያጠናክር ሆኖ ተገኝቷል።
በዚህ ስምምነት መሠረት አፕል በዚህ የፈረንጆቹ ዓመት መጨረሻ ላይ ይፋ ለሚያደርገው አዲስ እና ዘመናዊ የሲሪ አገልግሎት የጎግልን ጄሚናይ ቴክኖሎጂን እንደ ግብዓት የሚጠቀም ይሆናል። ይህ እርምጃ አፕል በዘርፉ ካሉ ተወዳዳሪዎቹ እኩል ለመጓዝ የሚያደርገውን ጥረት የሚያግዘው ሲሆን፣ በሌላ በኩል ደግሞ የጎግል እናት ኩባንያ የሆነው አልፋቤት ከኦፕን ኤአይ (OpenAI) ጋር እያደረገ ባለው የገበያ የበላይነት ፉክክር ውስጥ ትልቅ ብልጫ እንዲያገኝ ያስችለዋል ተብሏል።
ሁለቱ ኩባንያዎች ከዚህ ቀደም በጎግል የፍለጋ ሞተር ዙሪያ የነበራቸውን የቆየ ትብብር ወደ ሰው ሰራሽ አስተውሎት ዘርፍ ማሸጋገራቸው በኢንዱስትሪው ውስጥ ትልቅ ትኩረት ስቧል። ይህ አዲስ የሲሪ ስሪት ይበልጥ የተራቀቁ ጥያቄዎችን የመመለስ፣ የተወሳሰቡ ትዕዛዞችን የመፈጸም እና ከተጠቃሚዎች ጋር በተፈጥሯዊ ሁኔታ የመግባባት አቅሙ ከፍተኛ እንደሚሆን ይጠበቃል።
ዘገባዎች እንደሚያመላክቱት ይህ ስምምነት በቴክኖሎጂው ዓለም ያለውን የኃይል ሚዛን ሊቀይር የሚችል ሲሆን፣ በተለይም አፕል የራሱን የሰው ሰራሽ አስተውሎት ቴክኖሎጂ እያሳደገ ባለበት ወቅት ከጎግል ጋር መሰለፉ ዘርፉን ወደ አዲስ ምዕራፍ ያሸጋግረዋል ተብሎ ይታመናል።
የቴሌግራም ቻናላችን ይቀላቀሉ 👉 https://t.me/menaharia_fm
__
ሀሳብ እና’ሳ’ፍራለን 📞
👉011-639-28-52
👉011-639-37-63 (https://stream.zeno.fm/yw8poig9iwtuv)
ምላሽ ይስጡ