አሜሪካ እና ኢራን በተመድ የፀጥታው ምክር ቤት የቃላት ጦርነት ውስጥ ገቡ

ታህሳስ 15 ቀን 2018(መናኸሪያ ሬዲዮ)አሜሪካ እና ኢራን በኒውክሌር ድርድር ዙሪያ በተባበሩት መንግስታት ድርጅት የፀጥታው ምክር ቤት ስብሰባ ላይ እርስ በርስ ክስ ሲለዋወጡ ዋሉ:: ሁለቱ ሀገራት ድርድር ሲያካሂዱ ቢቆዩም፣ ባለፈው ሰኔ ወር በኢራን እና በእስራኤል መካከል የተነሳውና 12 ቀናት የፈጀው ጦርነት ሂደቱን እንዳስተጓጎለው ተገልጿል::

ዩናይትድ ስቴትስ በጦርነቱ ወቅት የኢራንን የኒውክሌር ማዕከላት በሃይል በመምታት ጣልቃ መግባቷን ተከትሎ፣ በሁለቱ ሀገራት መካከል ያለው ግንኙነት እጅግ ተካሯል:: ኢራን በምክር ቤቱ ባቀረበችው ክስ አሜሪካ የሉዓላዊነት ጥሰት ፈጽማለች ስትል፣ ዋሽንግተን በበኩሏ የኢራን የኒውክሌር እንቅስቃሴ ለዓለም ደህንነት ስጋት መሆኑን ደጋግማ ገልጻለች::

ይህ በሰኔ ወር የተካሄደው ጦርነት ከመከሰቱ በፊት ሀገራቱ አምስት ዙር የኒውክሌር ውይይቶችን አድርገው የነበረ ቢሆንም፣ አሁን ላይ ግን ድርድሩ ሙሉ በሙሉ መቋረጡንና ወደ ግጭት መሸጋገሩን የዲፕሎማሲ ምንጮች ጠቁመዋል::