የዶናልድ ትራምፕ በዩክሬኑ ፕሬዝዳንት ዜሌንስኪ ላይ እየጨመረ ያለው ጫና

ነሐሴ 12 ቀን 2017 (መናኸሪያ ሬዲዮ) የአሜሪካው ፕሬዝዳንት ዶናልድ ትራምፕ፣ የዩክሬኑን ፕሬዝዳንት ቮሎዲሚር ዜሌንስኪን በሩሲያ ላይ የሚደረገውን ጦርነት በተመለከተ ጫና እያደረጉባቸው መሆኑ ተነገረ። ፕሬዝዳንት ትራምፕ፣ ዜሌንስኪ ጦርነቱን አስቸኳይ ማቆም እንደሚችሉ በቅርቡ ባደረጉት ንግግር ገልጸዋል። ይህ ደግሞ ዩክሬን ከአውሮፓ እና ከአሜሪካ ጋር በቅርቡ ለምታደርገው ውይይት ቀድሞ የተፈጠረ የውጥረት መንስኤ ሆኗል እየተባለ ነው፡፡

ትራምፕ፣ ዩክሬን አሁን ያለችበትን ሁኔታ ግምት ውስጥ በማስገባት ለሰላም ስምምነት መዘጋጀት እንዳለባት ገልጸዋል። ይህ አስተያየታቸውም ከሩሲያ ጋር ባላቸው ግንኙነት ላይ ጥያቄዎችን አስነስቷል። በዚህ ሳምንት መጀመሪያ ላይ በሩሲያው ፕሬዝዳንት ቭላድሚር ፑቲን እና በትራምፕ መካከል በተካሄደው ውይይት ላይ ዜሌንስኪ አለመገኘታቸው፣ ጉዳዩን የበለጠ አወሳስቦታል ነው የተባለው።

በሌላ በኩል፣ የአውሮፓ መሪዎች ከዩክሬን ጎን በመቆም፣ የዜሌንስኪን አቋም እንደሚደግፉ ገልጸዋል። ይህ በመሆኑም በጦርነቱ ላይ የአሜሪካ እና የአውሮፓ አቋሞች የተለያዩ መሆኑን ያሳያል። ዜሌንስኪ ቀደም ሲል ከትራምፕ ጋር በዋይት ሃውስ ባደረጉት ስብሰባ ላይ ውጥረት እንደነበር ይታወሳል።

የዩክሬን ባለስልጣናት እና የምዕራባውያን ዲፕሎማቶች የትራምፕን አስተያየቶች በከፍተኛ ስጋት እየተከታተሉ ነው። ዜሌንስኪ ቀደም ሲል የትኛውም ስምምነት የዩክሬንን የሉዓላዊነት እና የግዛት አንድነት መጠበቅ እንዳለበት አጥብቀው መግለጻቸው ይታወሳል።

የቴሌግራም ቻናላችን ይቀላቀሉ 👉 https://t.me/menaharia_fm