እስራኤል የጠላትን ድሮኖች በአየር ላይ የመጥለፍ እና ወደ ራሷ ኃይሎች የመምራት ቴክኖሎጂን አዳብራለች ተባለ

ሐምሌ 24 ቀን 2017(መናኸሪያ ሬዲዮ) የጦርነት ስልት እና ቴክኖሎጂ አዲስ ምዕራፍ ላይ ደርሷል። እስራኤል የጠላት ድሮኖችን በአየር ላይ እያሉ በመጥለፍ እና ወደላካቸው ኃይል እንዲዞሩ የሚያደርግ አዲስ ቴክኖሎጂ ማዳበሯ ተዘግቧል።

ይህ ፈጠራ የአየር ላይ ጦርነትን ገጽታ በእጅጉ ሊቀይረው እንደሚችል እየተነገረ ነው።

በቅርብ ጊዜ የወጡ መረጃዎች እንደሚያመለክቱት፣ የእስራኤል የጦር ኃይል እና የቴክኖሎጂ ኩባንያዎች በመተባበር ይህንን አብዮታዊ ቴክኖሎጂ ፈጥረዋል የተባለ ሲሆን፤ ይህ ስርዓት የጠላት ድሮኖችን የመቆጣጠሪያ ሲግናሎችን በመጥለፍ፣ የራሳቸውን የመቆጣጠሪያ ስርአት በመጫን እና እነዚያን ድሮኖች ወደላካቸው ሃይል እንዲመለሱ በማድረግ ጉዳት የማድረስ አቅም አለው ተብሏል።

ይህ ቴክኖሎጂ የሳይበር ጦርነት እና የኤሌክትሮኒክስ የጦርነት ጥምረት ውጤት እንደሆነ የተገለጸ ሲሆን ስርዓቱ የጠላት ድሮኖች ከርቀት መቆጣጠሪያቸው ጋር የሚያደርጉትን ግንኙነት በመለየት፣ በመረበሽ ወይም ሙሉ በሙሉ በመቆጣጠር ይሰራል ተብሏል።

ይህም የጠላት ድሮኖች የሚያደርሱትን ስጋት ከመከላከል ባለፈ፣ ድሮኖቹን እራሳቸውን ወደ ጠላት በመመለስ ድርብ ጥቅም ያስገኛሉ ነው የተባለው።

ይህ ደግሞ በጦር ሜዳ ላይ ያለውን የኃይል ሚዛን በእጅጉ ሊለውጠው የሚችል ሲሆን፣ ወጪ ቆጣቢ እና ውጤታማ የመከላከል ዘዴ ሊሆን ይችላል ተብሏል።

ይህ የእስራኤል ቴክኖሎጂ ዓለም አቀፍ ትኩረትን የሳበ ሲሆን፣ ሌሎች አገራትም ተመሳሳይ አቅምን ለማዳበር እንዲነሳሱ ሊያደርግ ይችላል ተብሏል።

የድሮን ቴክኖሎጂ በጦርነት ውስጥ ያለው ሚና እየጨመረ በሄደ ቁጥር፣ እንደነዚህ ያሉት የመከላከል እና የማጥቃት አቅሞች ለወደፊት ግጭቶች ወሳኝ ሚና ይኖራቸዋል ተብሏል።

ይሁን እንጂ፣ የዚህ ቴክኖሎጂ ሥነ-ምግባራዊ እና ዓለም አቀፍ የሕግ ገጽታዎች ላይም ክርክር ሊያስነሳ ይችላል ነው የተባለው።

እስራኤል ያዳበረችው ይህ ድሮን ጠለፋ ቴክኖሎጂ፣ በዘመናዊው ጦርነት ውስጥ ትልቅ ለውጥ ሊያመጣ የሚችል ፈጠራ መሆኑ የተመላከተ ሲሆን ወደፊት የጦር ሜዳውን ገጽታ ሊቀይረው እንደሚችል ተመላክቷል።