በጨረቃ ላይ ውሃ ተመረተ

ሐምሌ 21 ቀን 2017(መናኸሪያ ሬዲዮ) የቻይና ሳይንቲስቶች የጨረቃን አፈር በመጠቀም ከ50 ኪሎ ግራም በላይ ውሃ ማምረት መቻላቸውን ይፋ አደረጉ።

ይህ ታላቅ ሳይንሳዊ ግኝት፣ ለወደፊት የሰው ልጅ በጨረቃ ላይ ዘላቂ መኖሪያ ለመመስረትና የጠፈር ጉዞዎችን ለማስፋት ከፍተኛ አስተዋጽኦ የሚያበረክት እንደሆነ ተመላክቷል።

የግኝቱ ዝርዝርና ሳይንሳዊ ዳራ ግኝቱ የተረጋገጠው ቻይና በ2020 ዓ.ም በቻንግኤ-5 የጠፈር መንኮራኩር አማካኝነት ከጨረቃ ይዛው በመጣችው የአፈር ናሙና (Lunar Regolith) ላይ በተደረገ ጥናት ነው።

ተመራማሪዎቹ የጨረቃን አፈር በከፍተኛ ሙቀት በማሞቅ፣ በውስጡ የተከማቸውን የውሃ ሞለኪውሎች በመልቀቅ ውሃ ማግኘት ችለዋል። ከዚህም በመነሳት፣ አንድ ቶን የጨረቃ አፈር ከ50 ኪሎ ግራም በላይ ውሃ የመስጠት አቅም እንዳለው ደርሰውበታል፤ ይህም ወደ 50 ለሚጠጉ ሰዎች የአንድ ቀን የመጠጥ ውሃ ፍላጎትን ሊያሟላ ይችላል ነው የተባለው።

የውሃው ምንጭ የፀሐይ ንፋስ በጨረቃ ላይ ከሚያስቀምጠው ሃይድሮጂን ጋር በጨረቃ አፈር ውስጥ የሚገኙ ማዕድናት በሚያደርጉት ኬሚካላዊ ምላሽ እንደሆነም ሳይንቲስቶቹ አስረድተዋል።

ይህ ግኝት ለጠፈር ምርምር ወሳኝ ምዕራፍ ተደርጎ ተወስዷል። ቀደም ሲል የጠፈር ተመራማሪዎች የሚያስፈልጋቸውን ውሃ በሙሉ ከምድር የማጓጓዝ ከባድና ውድ ተግባር ይፈጽሙ ነበር የተባለ ሲሆን፤ አሁን ግን በጨረቃ ላይ ውሃን ማምረት መቻሉ፣ የጨረቃን መሠረት ለመገንባትና ለረጅም ጊዜ በጨረቃ ላይ ለመቆየት ለሚደረገው ጥረት ትልቅ እገዛ ያደርጋል ተብሏል።

ከዚህም ባሻገር፣ ከውሃ ኦክስጅንና ሃይድሮጂን በመለየት ለሮኬት ነዳጅነት የመጠቀም ዕድልንም ይከፍታል ተብሏል።

የቻይና የጠፈር ኤጀንሲ (CNSA) ይህንን አዲስ ዘዴ በጨረቃ ላይ ለሚያደርጋቸው ቀጣይ ተልዕኮዎች ተግባራዊ ለማድረግ እቅድ እንዳለው የገለጸ ሲሆን፣ ግኝቱ የሰው ልጅ ወደ ጨረቃና ወደ ሌሎች ፕላኔቶች ለሚያደርገው ጉዞ ትልቅ ተስፋን ሰንቋል ነው የተባለው።