ጥይት የማያስመታ ቁሳቁስ ተፈጠረ

👉ሳይንቲስቶች ጥይቶችን የሚያቆም እጅግ ቀጭን የአልማዝ ጥንካሬ ያለው ቁሳቁስ ፈጠሩ

ሐምሌ 08 ቀን 2017(መናኸሪያ ሬዲዮ)ሳይንቲስቶች ጥይቶችን የማቆም አቅም ያለው፣ እንደ አልማዝ ጠንካራ የሆነ እና እጅግ በጣም ቀጭን የሆነ አዲስ ቁሳቁስ ማምራታቸው ተገለጸ። ይህ ግኝት ለወደፊቱ የጥይት መከላከያ ቴክኖሎጂ ትልቅ ለውጥ ሊያመጣ ይችላል ተብሏል።

የቁሳቁስ ሳይንስን ዓለም፤ በአዲስ ምዕራፍ ሊያስገባ የሚችል እጅግ አስደናቂ ግኝት ይፋ ተደርጓል። ሳይንቲስቶች፣ በጥይት ወይም በሌላ ከፍተኛ ኃይል ሲመታ እንደ አልማዝ የመጠነከር አስደናቂ ባህሪ ያለው “ዳያሚን” የተባለ እጅግ ቀጭንና ተጣጣፊ ቁሳቁስ ማዳበራቸውን አስታወቁ። ይህ ግኝት ለወደፊቱ የጥበቃ እና የደህንነት ቴክኖሎጂዎች አብዮታዊ ለውጥ ሊያመጣ እንደሚችል ተጠቁሟል።

ዓለም አቀፍ ሳይንሳዊ የምርምር ማዕከላት በተለይ በኒው ዮርክ ከተማ ዩኒቨርሲቲ የተካሄደ ጥናት መሰረት፤የተመራማሪዎቹ ቡድን እንዳስረዳው፣ ዳያሚን በአብዛኛው ከሁለት የግራፊን (አንድ አቶም ውፍረት ያለው የካርቦን ንብርብር) ንብርብሮች የተሰራ ነው ብለዋል።

ይህ ቁሳቁስ በተለመደው ሁኔታው እጅግ ተጣጣፊና ግልጽ ሲሆን፣ ነገር ግን በድንገተኛ ኃይል፣ ለምሳሌ በከፍተኛ ፍጥነት በሚንቀሳቀስ ነገር ሲመታ፣ የውስጡ የካርቦን አቶሞች በፍጥነት እንደገና በመደራጀት የአልማዝ የመሰለ ጠንካራ መዋቅር ይፈጥራሉ ነው የተባለው።

ይህ ድንገተኛ ጥንካሬ የመምታቱን ኃይል ወስዶ ያሰራጫል፣ በዚህም የመከላከያ ጋሻ ሆኖ ያገለግላል ተብሏል። ጫናው ሲቀንስ ደግሞ ወዲያውኑ ወደ ቀድሞው ተጣጣፊ ሁኔታው ይመለሳል። ይህ ባህሪ ቁሳቁሱ ለተለያዩ የደህንነት ፍላጎቶች ተመራጭ እንዲሆን ያደርገዋል ነው የተባለው።

የዚህ ቁሳቁስ ዋነኛው ጥቅም ቀለል ያሉ፣ ተጣጣፊ እና ከፍተኛ ጥበቃ የሚሰጡ የሰውነት ጋሻዎችን (body armor) ማምረት ነው ተብሏል። በአሁኑ ጊዜ ጥቅም ላይ የሚውሉት የጥይት መከላከያ ጋሻዎች በአብዛኛው ከባድና ሰፋፊ ናቸው የተባለ ሲሆን። ዳያሚን ግን በቀጭንነቱ፣ በቀላሉ ተለባሽ የሆኑ እና እንቅስቃሴን የማይገድቡ ጋሻዎችን መፍጠር ያስችላል ተብሎለታል።

ከዚህ በተጨማሪ፣ እንደ መከላከያ ሽፋኖች (protective coatings)፣ ለጠፈር ልብሶች (space suits)፣ እና ለተለያዩ ኢንዱስትሪዎች እንደ አዳዲስ እና የሚለምዱ ቁሳቁሶች (adaptable materials) ለመጠቀም ሰፊ እምቅ ችሎታ አለው ተብሎለታል።

የጥይት መከላከያ ቁሳቁሱ እንደ አልማዝ ይጠነክራል ሲባል ቋሚ የአልማዝ መዋቅር ይመሰርታል ማለት ሳይሆን፣ በግጭት ወቅት የአልማዝን ያህል ጥንካሬ ያገኛል ማለት መሆኑም ተመላክቷል።

ይህ ሳይንሳዊ ግኝት የወደፊቱን የደህንነት እና የጥበቃ ቴክኖሎጂዎችን ገጽታ በእጅጉ ሊለውጥ የሚችል ተስፋ ሰጪ እርምጃ ነው ተብሎለታል፡፡
__