ኢትዮጵያ የተቀቀሉ የሥጋ ምርቶችን ወደ ቻይና መላክ ልትጀምር መሆኑ ተገለጸ

ታኅሳስ 18 ቀን 2017(መናኸሪያ ሬዲዮ) ኢትዮጵያ የተቀቀሉ የሥጋ ምርቶች እና ተረፈ ምርቶችን ለቻይና ገበያ ልታቀርብ መሆኑን የእንስሳት ልማት ኢንስቲትዩት አስታወቀ፡፡

የእንስሳት ልማት ኢንስቲትዩት ምክትል ዋና ዳይሬክትር ዶክተር ሳህሉ ሙሉ እንደገለጹት፤ኢትዮጵያ ለመላክ እየተዘጋጀች ያለችው የተቀቀለ የበግ፣ ፍየል፣ የዳልጋ ከብት እና የግመል ስጋን ነው ብለዋል፡፡

በዋናናት ዒላማ የተደረገው የቻይና ገበያ ነው ያሉት ምክትል ዋና ዳይሬክተሩ “ለቻይና ገበያ ዒላማ አድርገን እንስራ እንጂ ውጤቱ ምርታችንን ለሚፈልጉ ሁሉም ገበያዎች ሁሉ የሚሆን ነው” ሲሉ ገልጸዋል፡፡

ምክትል ዳይሬክተሩ ከቻይና መንግስት እና ከሚመለከታቸው መስሪያ ቤቶች ጋር በተደረገ ንግግር “ከኢትዮጵያ የተቀቀለ የሥጋ ምርት እና ተረፈ ምርት እንደሚቀበሉ ይሁንታ ተሰጥቷል” ብለዋል።

ይህን ተከትሎ “እዚህ ኢትዮጵያ ያሉ የኤክስፖርት ስጋ ማቀነባበሪዎች ይሄንን ስጋ የመቀቀያ ቴክኖሎጂ በማምጣት በፋብሪካዎቻችው ውስጥ በመግጠም ዕድሉን ለመጠቀም እንቅስቃሴ እያደረጉ” መሆኑን ጠቁመዋል።

ለፋብሪካዎቹ ድጋፍ እየተደረገላቸው ነው” የሚሉት ዶ/ር ሳህሉ፤ ይሄ ፈቃድ ከተሰጠ በኋላ በቀጥታ ምርትን በዚህ አግባብ በማቀነባበር ወደ ትልቁ ገበያ የመግባት ዕድል እየተከፈተ ነው የሚገኘው ሲሉ አክለዋል።

ለውጭ ገበያ የሚቀርበውን የሥጋ አይነት በተመለከተ ሲያብራሩ “ከዋናው ቀዩ ስጋ ውጭ ያሉ ተረፈ ምርቶች፤ ቀንዱም ለአገልግሎት እንዲውል ተደርጎ ተቀነባብሮ ይላካል። ሌሎች የሆድ ዕቃዎችም በሙሉ በየፈርጃቸው ተቀነባብረው ወደ የሚፈለጉበት ገበያ እየተላኩ ነው” ብለዋል።

ዶ/ር ሳህሉ የተቀቀለ ሥጋ ለውጭ ገበያ የሚላክበትን ምክንያት፤ “አንዳንድ አገራት ወደ አገራቸው ለሚያስገቡት ምርት በጣም ጥብቅ የሆነ መስፈርት ነው የሚያስቀምጡት። ከዛ በመነሳት ነው ኢትዮጵያ ምርት ተቀቅሎ ለገበያ መግባት እንደሚችል ፈቃድ የተሰጠው” ሲሉ አብራርተዋል።

ይህ ጥብቅ የሆነ መስፈርት “አገራት የእንስሳት በሽታ ወደ አገራቸው እንዳይገባ የሚከላከሉበት ዘዴ ነው” ሲሉ ያክላሉ።
“መቀቀሉ በራሱ እሴት መጨመር ነው” የሚሉት ዶ/ር ሳህሉ፤ “ከጥሬ ምርትነት ተቀቅሎ ጥራት እና ደህንነቱ ተጠብቆ ነው ወደ መዳረሻ ገበያ የሚላከው ይሄ ምንም ጥርጥር የለውም አንዱ እሴት ነው” ሲል መግለጻቸውን ቢቢሲ ዘግቧል፡፡

የተቀቀለ ሥጋ መላኩ ዋጋ ላይ ስለሚኖረው ለውጥ ጥያቄ የቀረበላቸው ምክትል ዋና ዳይሬክተሩ፤ “ዋጋ ላይ እንደየመዳረሻ ገበያዎቹ እና ተጠቃሚ ምርጫ ዋጋውም በዛው ልክ ይለያያል። ቁርጥ ዋጋ የለም። አንዳንድ ገበያ ላይ ጥሩ ዋጋ የሚገኝበት ሁኔታ አለ። አንዳንድ ገበያ ደግሞ መደበኛ ዋጋ የሚገኝበት ሁኔታ አለ” ሲሉ ምላሽ ሰጥተዋል።

ስጋ ለመቀቀል የሚያስፈልገውን ቴክኖሎጂ በተመለከተ ዶ/ር ሳህሉ “ያን ያህል ከባድ አይደለም ትልልቅ አቅም ያላቸው የኤክስፖርት ማቀነባበሪያዎች ስላሉ ቴክኖሌጂውን ማስገባት እና መግጠም ብቻ ነው። ኢንቨስትመንት ይጠይቃል ዞሮ ዞሮ ግን ከቴክኖሎጂ አንጻር አዲስ ቴክኖሎጂም አይደለም ከባድም አይደለም” ብለዋል።

እንደ ምክትል ዋና ዳይሬክተሩ ገለጻ ኢትዮጵያ በዓመት 200 ሺህ ቶን ስጋ ለውጭ ገበያ የማቅረብ አቅም እንዳላት ተመላክቷል፡፡
__

ሀሳብ እና’ሳ’ፍራለን

መናኸሪያ ሬዲዮ 99.1

ሃሳብ፣አስተያየት እና ጥቆማ ለመስጠት የሚከተሉትን የስቱዲዮ ስልኮቻችን ይጠቀሙ

👉011-639-28-52
👉011-639-37-63

የቀጥታ ስርጭት  👉 📻 (https://worldradiomap.com/et/play/menaharia) radio 99.1 (https://stream.zeno.fm/yw8poig9iwtuv)

✅ https://t.me/menaharia_fm

✅https://x.com/MenahriaFm99_1

ትክክለኛውን የመናኸሪያ ሬዲዮ የዩቱዩብ አድራሻ በመቀላቀል ቤተሰብ ይሁኑ
➲  Youtube (https://www.youtube.com/channel/UC8uROsU69D8Ob65XapeHvIw)